KUCHING: Kelab Penyokong Barisan Nasional (BNBCC) Sarawak besemaya deka ngereja komitmen sida nyukung semua jaku lalau Kepala Menteri (KM) Datuk Patinggi Tan Sri Adenan Satem ba atur pengawa iya ti deka ngemunaska pengawa betebangka kayu batang nadai belisin enggau penyalah makai suap.
Chairman kelab nya, Abdullah Saidol madah, dikena ngemujur juluk nya ukai semina dilempai ngagai menteri kabinet aja enggau opis kandang menua tang begunaka kerejasama wakil rayat kelebih agi BNBBC.
“Kami betatika pekara tu lalu besemaya deka meri kerejasama ba jaku lalau Kepala Menteri sereta semua rayat kelebih agi kaban BNBCC sama deka bejalaika tanggungpengawa diri.
“Kami deka nabur penerang pasal pekara tu ngagai tuai-tuai di rumah panjai laban sida nyadi pending enggau mata ngagai kami, ba pengawa ngemunaska sebarang pengawa salah ke nyelai di sitak diri,” ku iya.
Iya bejaku munyi nya ba atur pengawa makai lemai ti digaga ulih BNBBC ti sama digulu ulih Tuai Pemegai Menua Sarawak Tun Pehin Abdul Taib Mahmud, Kepala Menteri Datuk Patinggi Tan Sri Adenan Satem enggau bini iya, Datin Patinggi Datuk Jamilah Anu sereta mnteri kabinet bukai di Sarawak Club ditu, empai lama ke udah.
Berindik ari nya ku iya, genap iku wakil rayat dilalau ngambika sida iya mutarka pekara tu enggau bebendar lalu enda semina mantaika pekara tu maya Aum Kunsil Nengeri aja tang pandangka peneka sereta pengeransing diri nya ba komuniti alai sitak ke dijaga sida.
“Ba pengawa bepilih besai menua ti deka digaga enda lama agi, kami besemaya deka negapka agi kubu di sitak kami.
“Kami deka bekerejasama enggau parti komponen BN bukai ngambi pulai baru kerusi ke udah lenyau sebedau tu…Nya munyi semaya kami,” ku iya.
Bekait enggau aum Kunsil Nengeri (DUN) sekali tu, iya madah, aum sekali tu bisi pemerat sereta nyelai mimit ke ukai semina ari mayuh pemadah baru sereta ngenyit tang ba jurai sereta bantai lima iti Rang Undang-Undang.
“Sekali tu, semua ADUN mantaika jaku sereta penemu sida iya bekait enggau isu tanah, rampa menua enggau bajet, kami mega maya aum nya minta penemu menteri kanan enggau menteri muda sama mantu kami.
“Kami mega nyaut penguji ke dipinta Kepala Menteri ke minta semua kaban BNBCC terus berani mantaika penemu sida iya maya aum sekali tu,” ku iya.