SARIKEI: Speaker Kunsil Nengeri (DUN) Sarawak, Datuk Amar Haji Mohamad Asfia Awang Nassar madah, chara ngajar bala anak diatu enti dibanding enggau 10 taun tauka 15 taun ke dulu suba dipeda jauh bebida seriris enggau ubah gaya pemansang pelajar ke maya hari tu.
Diatu, ku iya sistem pelajar menua udah berubah nitihka ubah pemansang lalu ngemeranka semua sukut, lebih agi dikena nempa modal mensia ke bekualiti.
“Pejalai enggau gaya ubah pelajar menua ke maya hari tu ukai semina ngemeratka pemansang enggau penyulut ba bidang akademik aja, tang mega mungkur bidang bukai.
“Tu nyengkaum pengulih sida ba pekara fizikal, pemanah ulah, penau nyadi ketuai, pengeregas enggau mayuh agi ke bukai.
“Utai ke baka tu beguna amat seriris enggau juluk menua nempa raban nembiak baru ke ulih besemekih enggau orang ke serambau enggau sida napi pemar dudi hari.
“Nangkan ke nya, sida ke tajam runding mega tusah deka dikelikuhka raban orang ke nadai betanggungjawap ti deka nyapai agenda diri tang nadai meri penguntung ngagai orang bukai,” ku Asfia.
Iya madah munyi nya rambau pengerami ‘Anugerah Kecemerlangan’ Sekula Sekondari (SMK) Bandar Sarikei, ensana.
Pengerami nya diatur ba Dewan Gemilang SMK Bandar Sarikei sereta digulu urung 500 iku orang nyengkaum nembiak sekula, pengajar, staf sekula enggau apai indai nembiak.
Kenu ku Asfia, seriris enggau juluk menua ke nyapai status menua maju taun mayuh bengkah pemansang udah dilanggur sereta dipejalaika perintah.
“Peluang tu patut dikena raban nembiak diatu enggau memanah, laban berindik ari pengilap sida ke mayuh bebasauka jam tau meri pangka ke enda manah ngagai diri empu.
“Pengerugi nya lebih agi lebuh sida enda ulih besemekih enggau orang bulih bepintaka pengawa dikena nupi diri sebilik jemah.
“Pekara ke bansa tu patut diperundingka bala nembiak ke maya hari tu, laban sida endang raban dikearapka menua dudi hari.
“Pengelubah sida enda ti enda berundingka pekara tu tau mai pengerugi ngagai mayuh orang, ukai semina ngagai sida empu tang mega ngagai menua,”ku Asfia.
Ba pengerami nya, Asfia bisi nyuaka chek RM10,000 ungkup Gerempung Apai Indai enggau Pengajar (PIBG) sekula nya.