SARIKEI: Raban orang indu kemaya hari tu patut berani napi semua penanggul ke bisi nyadi enti deka mujur dalam semua sukut pengidup sebaka enggau sida ke lelaki.
Sekretari Politik Ketua Menteri Sarawak, Kenil Jeraie madah, raban indu patut nyikap diri ngena runding ke ransing lebuh bejalaika pengawa enti deka ngulihka pemujur dalam pengidup.
“Sida patut berani ngubah runding enggau pikir ngambi ulih nyungkak pemanah pengidup kelimpah ari ngadaka penemu ke kreatif sereta ngembuan mayuh pengelandik.
“Raban indu ukai semina ngembuan tanggungjawap ngatur ruang bilik, tang mega nyadika pelasar dikena ngubah runding tetiap iku dalam ruang bilik sida. Kitai patut belematika pekara tu laban raban indu ngembuan guna ke chukup besai ungkup dalam ngemansangka menua tu.
“Taja pia, semina sida ke seruran besedia ari semua sukut sereta bepikir sechara strategik ke ulih mujur dalam semua pengawa ke dikereja,” ku iya.
Kenil mansutka jaku nya lebuh ngarika Kaban Parlimen Tanjung Manis, Datuk Hajah Norah Tun Abdul Rahman beserimbai enggau pengerami Hari Raban Indu Renggat Menua Sarikei, ke diatur ba Dewan Sri Nyelong Sarikei ditu empai lama ke udah sereta digulu urung 100 iku raban indu nyengkaum tuai raban bansa.
Sama bisi datai ba awak nya, pengari D.O Pelilih Menua Sarikei, Jemain Wahab, Chairman Gerempung Raban Indu Sarikei, Francisca Baweng, pengari Residen Sarikei, SAO Norasyikin Abdul Rahman.
“Sebedau tu, tanggungjawap orang indu semina dipeda mantu raban lelaki. Tu ulih dipeda ba tanggungpengawa ke dipangku sida baka matu laki sida menih sereta ngetau padi.
Ku iya, tikas pengidup raban indu kemaya hari tu lebih manah ari ke udah. Mayuh entara sida ke indu mangku sekeda pengawa besai dalam mayuh bengkah ejensi ke tebal agi dipangku raban lelaki sebedau tu.
“Tu tau nyadika peransang ngagai semua raban indu di menua tu sereta patut dikemeranka nyentuk ke jemah ila.
“Kitai mega ka meda raban indu berani datai ke mua sereta nyingkang mansang sebaka raban bukai dalam ngetanka hak diri,” ku Kenil.
Beserimbai enggau pengerami nya, Anugerah Tokoh Raban Indu renggat menua Sarikei mujur diberi ngagi Datin Mary Wong Mee Ha @ Wong Pick Hung ke mega dikelala enggau nama Datin Mary Masing.
Anugerah nya diberi ngagai Datin Mary Masing berindik ari mayuh pemujur sereta komitmen ke udah diberi ngagai iya kelimpah ari pengeransing iya bejalaika pengawa nyungkak pemanah pengidup raban indu ke ngujungka iya nyadi seiku raban indu ke chukup tebilang sereta dipebasaka mensia mayuh.