Dikarang Rengenyan Labang //
Penyerakup ke dipandangka diatu ukai maya pengawa bepilih aja
KUCHING: Serakup Parti Barisan Nasional (BN) enggau Raban Nembiak BN deka terus nyadi parti ti releven sereta mansang maju enda ngira sekalika maya pengawa bepilih tauka enda.
Beduduk ari pekara nya, Chairman Raban Nembiak BN Malaysia, Khairy Jamaluddin ngarapka Raban Nembiak BN enggau BN ari 13 komponen parti terus begempung.
Iya madahka Program Retreat Pemuda BN Malaysia sebengkah ari jalai dikena nentuka BN enggau Raban Nembiak BN terus relevan sereta mansang maju.
“Seiti kebuah kami ngatur Retreat tu iya nya dikena nyerakup tauka ngempung semua Raban Nembian BN, kelimpah ngayanka Raban Nembiak BN enggau BN ukai semina seiti nama ti idup maya pengawa bepilih aja.
“Kitai deka nentuka nama Raban Nembiak BN enggau BN tu terus relevan enggau mansang maju sekalika maya pengawa bepilih tauka enda, nya kebuah kitai gawa berengkah ari diatu.
“Nambahka nya kitai deka ngenukuka pemayuh bansa enggau jalai pengarap (dalam serakup BN) sereta penegap BN ngiring menua tu ulih tauka udah ngayanka penyerakup ti ngemeratka semua pupu bansa di Malaysia,” ku iya.
Khairy ti mega Ketuai Raban Nembiak UMNO mansutka pekara nya lebuh bejaku ba pengerami Program Retreat Pemuda Barisan Nasional (BN) Malaysia ti diatur ba sebengkah hotel ditu malam ensanus.
Pengerami nya udah dipenyadika Kepala Menteri ti mega Chairman BN Sarawak Datuk Patinggi Tan Sri Adenan Satem.
Bejaku baru, Khairy ngarapka Retreat nya ulih nyadika pelasar endur Raban Nembiak BN ari 13 serakup parti BN ulih betukar, bekunsi enggau ngiga penemu ari pangan diri.
Batang tuju Retreat nya mega dikena nentuka pengawa bepilih besai enggau bepilih negeri Sarawak, Raban Nembiak BN enggau BN ulih napi pemayuh pemar lebih agi pengudi kemaya hari tu tebal agi ari bala raban nembiak, ku iya.
Retreat nya diatur pengelama tiga hari, berengkah ensanus (21 November) nyentuk seharitu (23 November) ti ngena rambai jaku ‘Jiwa Politik Masa Hadapan Gagasan Malaysia’ ngempuruka urung 350 iku kaban ari 13 buah serakup BN serata Malaysia sereta pengari ari tiga buah Gerempung Ukai Dikuasa Perintah (NGO).
Program nya diatur Raban Nembiak BN Sarawak ti mungkur PBB, Parti Rakyat Sarawak (PRS), Parti Bersatu Rakyat Sarawak (SUPP) enggau (Parti Demokratik Progresif Sarawak) SPDP.
Serakup BN bukai ti sama datai masuk program tu iya nya UMNO, MCA, MIC, GERAKAN, Parti Progresif Penduduk Malaysia (PPP), Parti Bersatu Rakyat Sabah (PBRS), United Pasok Momogun Organization Sabah (UPKO), Parti Liberal Demokratik Sabah (LDP) enggau Parti Bersatu Sabah (PBS).
Pengari NGO iya nya Parti Barisan Kemajuan India Malaysia (IPF), Kongress India Muslim Malaysia (KIMMA) enggau Parti Makkal Sakti Malaysia (SAKHTI).
Bisi empat keretas kereja enggau bengkel diatur, entara pekara ti dikerandauka iya nya ‘Gagasan Malaysia’, ‘Pengukuhan Pemuda BN’, ekonomi enggau ungkus pengidup enggau penyerakup bansa sereta sekeda isu bukai.
Ba hari kepenudi (23 November) pesereta bejalaika program servis raban bansa ba tiga buah genturung pendiau iya nya Kampung Gersik, Kampung Tupong Batu enggau Kampung Sungai Apong.
Sama bisi datai ngagai pengerami nya, Ketuai Raban Nembiak BN Sarawak ti mega Menteri Kereja Raya Datuk Sri Fadillah Yusof, Presiden PRS Tan Sri Datuk Amar, Presiden SUPP Senator Datuk Prof. Dr. Sim Kui Hian, Sekretari Politik Kepala Menteri Abdullah Saidol enggau ke bukai.