KUCHING: Parti Progresif Demokratik Sarawak (SPDP) nadai penanggul ngenanka kerusi Pakan ti udah ditaban Presiden Parti Tenaga Rakyat Sarawak (TERAS) Tan Sri William Mawan ba pengawa bepilih ti deka datai.
Presiden iya Dato Seri Tiong King Sing madah parti SPDP diatu udah bisi lima iku chalun ti tau disabung maya pengawa bepilih lalu nyangkal tuduh sekeda ti madah SPDP nadai chalun ke tau menang ba kerusi Pakan.
“Jaku selebubu sekeda raban ti madah SPDP nadai chalun ke tau menang ba Pakan nya enda amat.
“Diatu parti udah ngelala lima iku chalun lalu iya ke pemadu manah deka bediri ngarika SPDP.
“Entara sida lima tu, bisi nya raban profesional enggau orang dagang,” ku Tiong lebuh dikerandau pemberita rambau pengerami SPDP Begulai Enggau Media ditu, malam ensanus.
Netapka kerusi Pakan sigi ungkup SPDP, Tiong ke baru diangkat nyadi presiden parti bedau lama tu tadi madah parti andal ulih ngerebut penuduk nya ari Mawan.
Ngenang kaul ke sama, Tiong mega madah Kilat Beriak (seiku luyar) deka ngarika SPDP ba kerusi Krian ba pengawa bepilih ti disadang diatur sebedau bulan April 2016.
Kerusi Krian diatu dipegai pengari Parti Keadilan Rakyat (PKR) Ali Biju pengudah menang ba pengawa bepilih 2011 ngalahka Datuk Peter Nyaruk.
Ba kaul bukai, Presiden Kuching Divisional Journalist Association (KDJA) Sulok Tawi ba jaku pengelalu rambau pengerami malam nya madah Tiong ke mega Kaban Parlimen Bintulu deka ngiring SPDP nempa pemujur besai jemah.
Ku iya, Tiong seiku ketuai ke chukup talukka parti sereta deka meda parti tegap enda baka presiden ke dulu ti udah ngalih ngagai parti bukai.
Bela datai Kaban Mas Gading Anthony Nogeh, Kaban Parlimen Baram Anyie Ngau sereta kaban SPDP ke bukai.