Jaku ajum sentang isu NCR patut dikemengal

0

Sekeda raban ke suah ngena isu tu laban sida deka ngulihka penguntung ungkup diri empu

KANOWIT: Rayat ditesau bela mereti sentang isu-isu tanah Hak Adat Bumiputera (NCR) awakka sida enda mudah kena ajum sekeda raban.

Kaban Kunsil Nengeri (ADUN) Ngemah Alexander Vincent (gambar) madah, bisi sekeda raban dipeda suah ngena isu nya laban deka ngulihka penguntung ungkup sida empu.

“Nyema kita mereti sentang isu-isu NCR tu enggau lenak, kita enda mudah tekuing runding lebuh tedingaka jaku ajum ari orang ke baka nya.

“Kemengalka pending lebuh jaku orang ke baka nya laban sida bisi juluk diri empu nya kebuah baka nya,” ku iya.

Iya madah munyi nya rambau Pengerami Tuai Begulai Enggau Rayat di Rumah Basil Ujang, Sungai Pedai ditu, kemari.

Sama bisi datai Sekretari Politik Kepala Menteri Maurice Giri, Pemesai Pelilih Kanowit Katis Noel Nyabong, Pemesai Opis Pemadah Pelilih Kanowit Wan Mohd Zuki Wan Ismail sereta bala tuai raban bansa ke bukai.

Dulu ari nya, Alexander diberi basa bejadi projek jalai simen di Rumah Basil ke beungkus RM80,000.

Iya madah, kelimpah ari sukut pemansang, perintah mega berundingka chara dikena mantu nyungkak penatai pemisi rayat nengah mayuh chara baka betanam betupi, bekebun dandang besai enggau mayuh agi ke bukai.

“Ngemansangka tanah-tanah rayat mega sebengkah ari pengawa kami dikena nulung nyungkak penatai pemisi rayat.

“Nya alai, perintah nyendiaka mayuh bengkah skim enggau bantu nyengkaum tanah rayat ngambika tau meri penguntung ngagai rayat empu kaban nya endang peluang ke manah,” ku iya.

Nangkan ke nya, iya madah sitak Sungai Pedai udah nerima mayuh bengkah projek pemansang ari perintah BN baka projek jalai raya, ai engagu bekal elektrik.

“Baka nya mega enggau pengawa meri geran projek mit pemansang menua pesisir  (MRP) ungkup Komiti Pemansang enggau Pengelikun Genturung Pendiau  (JKKK) rumah-rumah panjai ditu.

“Pengawa magi MRP tu mega endang pengawa perintah BN dikena mantu ari sukung belanja ngagai rayat. Nadai perintah bukai baka BN ulih baka nya ke seruran ngemeratka peminta rayat,” ku iya.

Alexander madah, genap pengari rayat nyengkaum iya empu seruran berundingka chara dikena ngemansangka sesebengkah sitak nengah mayuh projek perintah ke bisi dalam Langgur Pemansang Malaysia Lumpar Kesepuluh (RMK10) ke udah ambis lalu udah tu RMK11.

Iya mega nesau mensia mayuh ngambika terus tegap nyukung perintah BN ke nyengala dipeda ngemeratka peminta rayat.

Ba pengujung pengerami, iya bisi meri MRP penyampau RM10,000 ungkup JKKK Rumah Basil lalu RM3,000 ungkup biro indu rumah panjai nya.