KAPIT: apai indai dipinta seruran ngemeratka ulah anak lebih agi lebuh maya sida begunaka internet kena nyelihaka sebarang ulah enggau runding ke enda menuku dikereja sida nyengkaum meda video kamah sereta mayuh ke bukai.
Jaku lalau nya dipansutka Wong Ching Ping beserimbai enggau Aum Ninting Taun Gerempung Gerija Methodist Sarawak ditu, empai lama ke udah.
“Media sosial ngembuan kuasa ke ulih nguingka runding seseiku mensia ngagai ulah ke enda menuku. Naka ke diatu, nadai seiku ulih nagang raban nembiak ari begunaka internet. Nya alai, apai indai patut ngungkupka awak ke chukup begulai enggau anak ngambi ulih ngemataka pengawa ke dikereja anak diri. Nengah chara nya, pengawa sereta ulah enda menuku ulih diseliahka,” ku iya.
“Nembiak kemaya hari tu muntang alah dikuasa mayuh bengkah media rama ke ulih ngerusak runding enggau ulah sida nyengkaum internet, facebook, wechat, whatsapp mayuh agi ke bukai. Semua bansa media sosial tu tau ngenataika penanggul ngagai raban nembiak enti dikena nengah chara ke salah,” ku iya nandu.
Iya mantaika penemu nya lebuh bejaku ba sebengkah atur pengawa ‘and Social Media’ke diatur Raban Komiti Pengintu Rama Kapit ba Dewan Methodist Hock Ing, Kapit, empai lama ke udah.
Kelimpah ari nya, Wong Ching King ngelalau raban apai indai ngambi seruran ngemeratka pemanah ulah anak sida ngichaka enda muntang teparuk enggau pengawa jai sekalika nengah media rama tauka chara bukai. Pekara tu chukup beguna kena nempa raban nembiak ke imun pendiau sereta ngembuan ulah ke menyana.
Entara lalau bukai ke bisi dikenataika raban komiti rambau program nya nyengkaum licha bekaul enggau ‘Violence’, ‘Prevention’, ‘and Balanced Diet’sereta mayuh ke bukai.
Lebuh aum nya, Reverend Pastor Yu Ming Puo nyuaka tepa ngagai Wong Ching Ping pengudah ngenataika licha.