PENGERING DALAM GEMPUNG BN: Jabu lebuh bejaku maya atur pengawa nya. Bela bisi ayan dalam gambar, Rundi (dua kanan).
Parti tu begulai enggau komponen BN bukai terus ngemeratka rayat kena nyungkak pemansang nengeri
Dikarang Ambrose Rirang //
BINTULU: Parti Pesaka Bumiputera Bersatu Sarawak (PBB) terus bejalaika pengawa nyadi ketuai begulai enggau pampang parti bukai dalam Barisan Nasional (BN) kena ngetanka penegap perintah BN di nengeri tu, ku Sapit Kepala Menteri Sarawak, Datuk Patinggi Tan Sri Alfred Jabu Numpang.
“PBB nyadika tulang belakang ngeringka perintah BN di nengeri tu pechayaka penegap penyerakup parti BN ulih nyadika pengering ke ngujungka BN terus megai penuduk merintah nengeri tu dalam pengawa bepilih ke deka datai,” ku iya.
Iya mansutka jaku nya lebuh bejadi “Seminar Percambahan Minda bersama Pemimpin PBB’ ke diatur ba sebengkah hotel ke chukup tebilang ditu, pagi kemari.
Ku iya, nyadi sebuah pampang parti ke ngembuan guna ti chukup besai di nengeri tu, PBB deka terus bejalaika pengawa sereta ngemeratka rayat ke dipegai perintah BN dikena nyungkak pemansang rayat di nengeri tu.
Tajapan tu ukai pekara ke muntang dikereja ditambahka mayuh isu ke enda ngelantangka hati ti dikenataika piak ke enda betanggungjwap, pekara nya enda nyadika penanggul ngagai PBB dalam bejalaika pengawa nyungkak pemanah pengidup rayat dalam semu sukut nyengkaum sektor ekonomi, pelajar sereta mayuh agi ke bukai.
“Naka ke diatu, aku meda PBB chukup ransing bejalaika tanggungjawap parti ngintu pengelikun politik sereta ngadaka kaul ke manah entara raban bansa di nengeri tu,” ku iya.
Nengah pengelikun enggau kaul tu, semua program sereta perambu pemansang ke udah diperambu ulih dipejalaika enggau manah sereta nadai penanggul nitihka atur ke udah ditetapka.
Nya alai, ku iya, pemansang ke diterima rayat kemaya hari tu tampak nunjukka pemujur perintah ngemansangka menua tu kelimpah ari nyeliahka jaku petenah ke selalu ditabur piak penyakal ke semina nemu bejaku kusung aja. Tang diatu rayat ulih beratika pekara nya enggau silik sereta ngaku raban penyakal enda ngembuan penau merintah nengeri tu sebaka perintah Barisan Nasional ke dipegai Datuk Patinggi Tan Sri Adenan Satem.
Nangkanka nya, Jabu madahka perambu pemansang ke digaga perintah dikena ngemansangka rayat di menua pesisir deka terus dikemeran ngambika sida ulih ngasaika pemansang sebaka rayat di kandang menegeri.
“Kitai sama bela nemu, ke tebal agi raban bumiputera ke nyeretai parti PBB nya rayat ke datai ari menua pesisir ke endang lama udah nunjukka sukung sida ngagai perintah BN enggau enda betatak,” ku iya.
Seminar nya digulu urung 400 iku kaban parti PBB ari pelilih menua Bintulu nyengkaum Kakus, Belaga, Jepak, Kidurong enggau Kemena.
Sama bisi datai ba seminar nya, Menteri Muda Rengka Rama (ELektrik enggau Penyambung)Datuk Dr Stephen Rundi Utom Menteri Muda Dagang Temuai (Promosyen), Datuk Haji Talib Zulpilip.