KUCHING: Penanggul belanja enggau enda sepenemu mayuh nyadi pemun laki kena jamah bini, ku Menteri Pemansang Orang Indu, Ruang Sebilik enggau Raban Bansa Dato Sri Rohani Abdul Karim.
Taja ari sukut statistik, nunjukka penyampau ripot polis diterima bekait enggau kes tu enda mayuh, laban maya kes tu udah dibai ngagai polis dia kes bansa nya nadai dibechara laban laki minta nutup kes.
“Sekeda laki tu lebuh kena jamah, sida semina besebana nengah laman web opis menteri kami. Sida agi nyalam, enti sida iya besebana pan semina ngena nama kangau aja, nya kebuah sekeda kes nya enda ulih dipansik enggau manah,” ku Rohani.
Iya madah munyi nya ba aum media pengudah bejadi ‘Semina Keusahawanan Wanita 2014’ ditu.
Program tu diatur Opis Biro Wanita lalu bisi digulu urung 300 iku indu ke bedagang.
Nangkan ke nya, ku Rohani bedau lama tu tadi, seiti kes bini nyamah laki di Melaka, indu nya nyamah laki iya enggau pengabis ati.
Diatu ku iya, enda baka suba, kitai seruran ninga laki nyamah bini, tang diatu nyau kes bini nyamah laki.
“Anang enda ingat, nyamah tu ukai reti bepalu ba tubuh aja, tang kekutap meri jaku jai pan tau disebut dalam kategori nyamah. Ambika chunto jaku ulih mediska ati.
“Diatu kami ngemasukka reti jaku jamah (emotional) dalam genteran tusun ukum (laya dalam rumahtangga) nyadi seiti ari atur ke berat,” ku iya seraya madah kes baka tu enda mayuh nyadi di Sarawak.