Penerima bantu JKM ke udah parai patut diripot

0

Dikarang Jacqueline R. David //

KUCHING: Menteri Pemansang Orang Indu, Diri Sebilik enggau Raban Bansa Dato Sri Rohani Abdul Karim madah, Opis Pengelantang Pendiau Mensia Mayuh (JKM) deka neritka atur ngagai barang sapa kaban belayan tauka diri sebilik ke agi nerima bantu ninting bulan ari JKM nyema penerima ke patut nya udah parai.

“Enti ditemu JKM, sida deka diasuh babayar ngagai JKM, nitihka pengelama sida iya udah nerima ‘bantu’ nya,” ku iya.

Sebedau tu, ku Rohani bisi seiti kes nyadi di semenanjung iya nya orang ke patut nerima bantu nya udah parai tiga taun, tang laban sida sebilik nadai kala ngeripot ngagai JKM, bantu nya seruran diberi dalam timpuh tiga taun nya, datai ke kes nya ditemu pemesai JKM.

“Nya alai, diatu bisi atur baru, barang sapa ke ditemu ngakal bansa nya, ruang bilik nya diasuh mayar pulai baru penyampau, dalam kandang iya enda ngeripot penerima bantu udah parai,” ku Rohani.

Iya madah munyi nya ngagai pemberita rambau ‘Seminar Keusahawanan Wanita 2014’ di sebengkah hotel ditu, kemari.

“Semua ripot bekait enggau kes nya nyadi di semenanjung lalu entara pemayuh ke ke nyadi nya semina seiku aja bedau mayar.

“Tebal agi kes  tu nyadi di Selangor enggau Negeri Sembilan sereta Melaka. Kami mujur ngambi semua duit nya pulai baru tang nya meh ke nyadi penanggul,” ku Rohani.

Iya nandu baru, ngarapka penyalah baka tu nadai agi nyadi.

Berindik ari kes tu, diatu udah bisi sistem ke manah agi ke dikumbai ALIS, dikena ngelala rintai nama orang ke udah parai diterima KPWKM  ari Opis Pengerijista Bansa (JPN).

“Enti sema nama pemati nya bisi dirikod ba JPN, bantu ke diberi ngagai penerima (ke udah parai) nya deka dikinsil,” ku iya.

Entara nengeri di Malaysia, semina Sarawak aja ke bisi sistem ngeripotka pekara sida sebilik ngagai JKM dalam timpuh enam bulan sekali.

“Reti nya, kira enam bulan, sida sebilik ke ke ngibun penerima bantu JKM deka ngeripot madahka penerima agi idup. Nya alai, nengeri di semenanjung patut ngena sistem baka di Sarawak,” ku iya.

Nangkan ke nya iya ngelalau orang ke sebilik enggau penerima bantu patut ngaga ripot dalam timpuh ke patut ngambika enda ngenusah sida dudi hari.