Dikarang Judan Bungap //
SIBU: Sarakup Dayak Sarawak (SDNU) Pampang Sibu deka begulai enggau University College Of Technology Sarawak (UCTS) matak nembiak bansa Dayak nampung pelajar ba universiti nya.
Chairman SDNU Pampang Sibu Tengku Gruna madah, sida bisi baum begulai enggau UCTS berandau ke pekara nya, kilah ensana.
“Udah tu ila, kitai deka begulai enggau UCTS ngatur program nyengkaum ngelawa menua pesisir ngambika ulih meri penerang silik ngagai mensia mayuh senentang universiti tu.
“Ari program nya, kitai ngarapka nembiak bansa Dayak lebih agi bansa Iban tebuka ati deka nampung pelajar ba UCTS,” pia ku iya madah.
Randau nya bela digulu Menijar Besai UCTS Clement Langit.
Tengku mega madah, naka ke diatu nembiak bumiputera ke belajar ba UCTS agi mengkang kurang iya nya urung 10 persin.
“Ba randau tu mega, UCTS madahka bisi juluk ati deka meda penyampau nembiak bumpitera ke belajar dia nambah ngagai 30 persin udah tu ila,” ku iya madah madahka baru.
Kelimpah ari nya, ku iya, bansa Dayak patut ngambi awak belajar ba universiti nya laban ke sebaka tikas baka univertisi perintah ke bukai ba menua tu.
“Rayat lebih agi ba sitak tengah tu patut berasai temegah ati laban bisi universiti ke semak baka UCTS tu.
“Kitai ngarapka bala apai indai enggau nembiak empu beambi ulih enggau pekara tu,” pia ku iya madah.
Ba pekara bukai, Tengku bisi madah kena 3 December ti deka datai, SDNU Pampang Sibu begulai enggau Opis Pengintu enggau Pengemata Tanah Sarawak (SALCRA) deka ngatur program randau ba Balai Mensia Mayuh Song.
Program randau tu ila deka nerangka tanggungpengawa SALCRA ba pekara bekaul enggau pemansang tanah nyengkaum pemansang ba menua pesisir.