Dikarang Chris Bishop //
KUCHING: Perintah deka nanggung sekeda kus pengawa ngaga Rumah Mesra Rakyat (RMR) ngambika rayat ke kurang penatai pemisi ulih meli rumah ungkup diri.
Ngemujur juluk nya, Menteri Pengawa Berumah Datuk Amar Abang Johari Tun Openg madah, entara ungkus ti deka ditanggung perintah iya nya ungkus ba pengawa piling kelimpah ti ngurangka bayar premium tanah.
Beambika chunto RMR di Taman Mesra Bako, Abang Johari madah, genturung pendiau nya keterubah iya di menua tu bekenaka chara nya lalu atur nya udah nyaup ngurangka bayar ninting bulan pemeli.
“Nitihka bayar premium tanah ke ditetap Opis Tanah enggau Penyukat (JTS) ba projek Palan Pengentap Pendiau Bengoh, bayar premium tanah ba RMR mega udah ditetapka ba penyampau RM2,500.
“Pekara tu udah disetuju kepala menteri ke dulu sereta mega iya ke diatu lalu ketegal gaya ekonomi nengeri tu ti majak nambah, perintah setuju nanggung ungkus kereja piling.
“Retinya, penyampau bayar bulan ti dibayar pemeli RMR di Taman Mesra ditu deka kurang ari bayar ke dulu agi ari tu,’ku iya.
Iya mansutka jaku tu ba Pengerami Meri Basa enggau Terima Kasih di Taman Mesra Bako ditu, kemari.
Ku iya nambah, enti dulu agi ari tu, pemeli di genturung pendiau nya mayar RM447.49 sebulan tang pengudah ungkus kereja piling ditanggung perintah sereta bayar premium tanah dikurang, pemeli semina mayar RM 153.28 sebulan.
“Tu meh bengkah chara ti deka dikena kitai nyendiaka RMR tauka Rumah Mampu Milik (RMM) ke bukai di nengeri tu ungkup pemaik rayat,’ku iya.
Ba Muara Tebas kitai deka ngaga 63 buah rumah RMR sereta 615 RMM dalam timpuh ke semak tu, tandu iya.
Dulu agi ari nya, Chairman Pengatur Pengawa Dollah Harun ba jaku pengelalu iya madah pengudah perintah mutuska pekara nya, pemeli rumah RMR diatu semina mayar lun ba penyampau RM40,000 – RM44,000 aja lalu jauh kurang ari lun keterubah ti manggai ba penyampau RM66,000 – RM110,000.
‘Enti suba kami mayar lun ninting bulan ba penyampau RM234 enggau RM447 nitihka bengkah rumah tang diatu kami semina mayar entara RM122 – RM153,’ku iya.
Bela datai Menteri Muda Pengawa Berumah Datuk Karim Hamzah, ADUN Demak Laut Dr Hazland Abang Hipni, Chairman Housing Development Corporatin (HDC) Datuk Dr Abang Rauf Abang Zen enggau orang bukai.