Diatu indu di mengeri udah jauh mansang tang ukai reti indu di menua pesisir nadai peluang napat sida
PAKAN: Raban orang indu ari menua pesisir patut ransing nyikap diri sereta regas ngereja pengawa ngambika sida enda tinggal singkang ari raban orang indu ke diau di mengeri.
Menteri Pemansang Rama, Tan Sri William Mawan Ikom madah, diatu endang enda ulih dikeengai, raban orang indu di mengeri udah jauh mansang ke mua, ngelebus ninggal orang indu di menua pesisir, tang semua tu ukai reti orang indu di menua pesisir nadai peluang napat sida.
“Batang pekara ke patut dikembuan raban orang indu di menua pesisir nyema sida deka napat indu di mengeri sida meseti bisi pengeransing ati, bisi pengandal ke diri empu, pintar nguna peluang ke bisi dipeda ngelingi sida, berani nguji pekara baru sereta enda mudah tepantup ati.
“Indu ari menua pesisir enda ibuh ngerunding dini alai sida berindik, lebih agi berundingka diri jauh ari kandang mengeri ukai nyadika penanggul endur sida maju ke mua, tang sida patut nguna utai ke diasai maya nya nyadi seiti peluang baru ke pemadu manah endur sida ngerandang jalai nyingkang napat indu di mengeri.
“Kitai deka meda raban orang indu tu beratika pekara tu nyadi seiti peluang ke chukup besai endur sida ngemansangka pengawa lebih agi dikena ngenampakka nama orang indu ari men-ua pesisir mega ulih teulihka pemujur sebaka enggai indu di mengeri,” ku Mawan.
Iya madah madah munyi nya rambau pengerami Hari Orang Indu Peringkat Daerah Pakan ke diatur di Dewan Masyarakat Pakan, ensana.
Kenu ku Mawan, ke maya hari tu enda ulih dikeengai raban orang indu beguna amat dalam nyaup ngemansangka menua.
“Orang indu ngembuan utai ke manah dikena nyaup ngemansangka bansa, pengarap enggau menua. Berindik ari nya, orang indu patit dibasa ba genap sukut laban pemansang sesebengkah modal mensia ketegal bisi orang indu.
“Berebak enggau nya mega, kitai deka meda raban orang indu bebendar ngubah runding lama ke suah ngumbai orang indu semina mujur sereta landik ngereja pengawa ba dapur aja.
“Tang diatu, nyau deka setengan orang ke udah mujur mandangka penemu ke baka nya enda betul sereta ulih diubah, raban sida nemu nyingkang sereta ulih besemekih enggau orang lelaki ba semua sukut pengawa,” ku tandu Mawan.
Nya alai, ku Mawan, orang indu anang mudah tepantup ati enggau pengulih ke udah dijapai nya, tang patut bebendar agi nambahka pemujur, sekalika nya ulih kediri tang begulai enggau diri sebilik, orang bukai enggau menua.
Ba pengerami nya, bisi diatur pengawa nyuaka ‘Anugerah Tokoh Wanita 2014’ Renggat Pelilih Pakan enggau Anugerah Usahawan Wanita 2014 Renggat Pelilih Pakan.
Ba Anugerah Tokoh Wanita 2014 Renggat Pelilih Pakan diberi ngagai Puan Selah Kasen, lalu Anugerah Usahawan Wanita 2014 Renggat Pelilih Pakan diberi ngagai Puan Theresa Fitz Patrick.
Seduai nerima anugerah nya sereta disempulang enggau trofi, setipikit, enggau duit RM300 seiku.
Rambau pengerami nya, Mawan mega enda tinggal ngungkupka geran sepenyampau RM20,000 ngagai komiti pengatur pengerami.
Sama bisi datai iya nya Residen Sarikei, Dahim Nadot, Pemesai Pelilih Pakan, Alex Liau, Chairperson Pengatur Pengerami Hari Orang Indu Renggat Pelilih Pakan, Lyrine Sipai Pudon, sereta urung 200 iku sida ke diau besemak.