KAPIT: Kelab Lions Song ditu udah mujur ngatur kimpin nyali darah ke diatur ba Song Waterfront kena ujung minggu nyin tadi.
Urung 15 pain darah mujur diterima raban Teknologi Makmal Perubatan Sepital Kapit ti betuaika Hanapi Sli ari mensia mayuh ke ngembuan penyiru meri darah beserimbai enggau kimpin nya.
Presiden Lions Club Song, Hung Haw Hui ngenataika pengaga ati sereta meri besai terima kasih ngagai raban komiti pengatur pengawa kimpin nya berindik ari sukung ke chukup tegap ti beri sida sepemanjai kimpin nya dipejalaika.
Iya madahka kimpin meri darah nya sebengakah ari atur pengawa ke seruran dipejalaika kelab nya dikena nunjukka penyiru sida ngagai mensia ke begunaka bantu nya kelimpah ari narit lebih mayuh mensia datai meri darah ngambika ulih nulung nyelamatka nyawa mensia bukai.
Beserimbai enggau kimpin nya, bisi sekeda raban pemeri darah ke deka meri darah tang enda ulih laban ngembuan penanggul bekaul enggau darah.
Tang enda ngawa ku iya.
Laban pementas sida ke deka meri darah nya chukup manah sereta patut diberi basa.