KUCHING: Opis Menteri Pemansang Rama (KPS) begulai enggau Gerempung Bansa Dayak Sarawak (SDNU) sereta saup Opis Menteri Dagang Temuai (MoT)Malaysia ngelaluka semua ke bisi ati deka masuk Pekit Nyumpit Tebuka Sarawak di Le Park, Pusat Sivik, Kuching ditu kena 29 enggau 30 November tu.
Mandal presiden SDNU, Anthony Banyan madah, mayuh perais deka diperebut ba renggat antarabansa pekit nyumpit nya.
Tim SDNU, Samarahan enggau Julau udah ditetap ngarika Sarawak lalu pia mega tim Orang Asal ari Semenanjung Malaysia mega udah ngenetapka diri ngambi bagi maya nya.
Pontianak, Singkawang, Landak enggau pelilih menua Sintang ari Kalimantan Barat Indonesia deka nganjung tim sida lalu pengari Kalimantan Tengah enggau Timur apin ditemu ngenetapka diri ngambi bagi ba pekit nya.
Berebak enggau nya, Anthony minta mayuh agi tim ngambi bagi ba pekit nya lebih agi ari raban Orang Ulu enggau Bidayuh.
Dalam pekit tu mega bisi dibagi ngagai empat lelaki enggau empat indu seraban lalu pia mega tim nengali kediri.
Indu tauka lelaki ke pemadu landik ba pengawa nya deka diberi gelar Kumang Nyumpit tauka Keling Nyumpit.
Barang sapa ke bisi ati deka bejualka tepa, barang pakai tauka irup tau nirika seruyuk sida maya nya lalu tiap buah dipinta mayar RM100 aja.
Sebarang tanya pasal pekara tu tau dikenatai nuju Usop Kilat nengah lumur telefon 0111- 4075198 tauka Anthony ba lumur 019-8884900.