Sitak Engkilili majak dikemansang seagi rayat nyukung BN

0

ENGKILILI: Pemansang ba sitak Kunsil Nengeri (DUN) Engkilili deka majak nyadi nyema rayat ditu terus nyukung Barisan Nasional (BN).

Kaban Kunsil Nengeri (ADUN) Engkilili, Dr Johnnicall Rayong Ngipa madah, bukti iya diatu udah dikemujurka sekeda projek Bekal Eletrik Menua Pesisir (BELB), bekal ai beresi enggau jalai raya ba ditu.

“Pekara tu nyengala dipeda kenyau aku nyadi pengari rayat ditu,” ku iya rambau Pengerami Tuai Begulai Enggau Rayat sereta bejadi Jalai Kampung di Rumah Langkop Marop Atas Engkilili, ditu, empai lama ke udah.

Iya madah, naka ke diatu agi nyamai endur iya ngelangkar sereta ngemujurka mayuh bengkah projek pemansang baka ke udah dipeda mensia mayuh.

“Endang udah nyadi tanggungpengawa aku ngemansangka DUN Engkilili lalu aku ngarapka rayat ditu enda nempayaka projek pemansang lalu seruruan nitihka BN,” ku iya.

Ba pengerami nya, Dr Rayong madahka diri deka ngungkupka projek mit pemansang menua pesisir (MRP) sepenyampau RM10,000 suh Komiti Pemansang enggau Pengelikun Genturung Pendiau (JKKK) Rumah Langkop lalu RM5,000 ungkup Biro Indu rumah panjai nya.