ECAC dikearap ulih ngenegapka adat enggau main asal etnik minoriti

0

KUCHING: Adat enggau main asal etnik minoriti di menua tu nyengkaum bekaul engau jaku asal dikearapka ulih dikenegap sereta dikemeran nengah penumbuh ‘Ethnic Culture Advisory Council’ (ECAC).

Menteri Pemansang Rama Tan Sri William Mawan Ikom madahka diri arap bendar ngagai 35 iku kaban ECAC endang orang ti bepengelandik dalam bidang budaya etnik ke udah dipilih mantu opis menteri iya betapi enggau pemar lebih agi bekaul enggau pengawa ngenegapka budaya etnik di negeri Sarawak.

Kebuah pia ku iya, laban dalam nuju nyadi menua maju lebuh manggai taun 2020, rayat betapi enggau mayuh pemar nyengkaum rayat Sarawak ti ngembuan mayuh pupu bansa sereta gelombang transformasyen ti meri pangka ngagai pengidup tiap hari.

“Kami numbuhka gerempung penyanding penemu ti disebut enggau nama Ethnic Cultural Advisory Council (ECAC) bisi 35 iku pakar udah dichiri ti bepenemu dalam bidang budaya etnik ti nyengkaum pakar jaku, ketuai gerempung, orang ti kala nyadi menteri enggau kaban politik, kala gawa enggau opis perintah, pengajar sereta ketuai raban bansa ngambika ulih mantu Unit  Budaya Etnik ngemansangka jaku etnik di menua tu.

“Kami amat ngarapka penumbuh kaunsil tu (ECAC) ulih mantu ngenegap sereta ngetanka jaku etnik ari punas lebih agi bansa minoriti baka Kayan, Kenyah, Lun Bawang, Bidayuh, Melanau enggau Iban.

“Enda kurang ari empat buah jaku etnik baka Narum, Sihan, Lahanan enggau Bukitan ti dikeirauka deka punas baka ti nyadi ba jaku Seru,” ku iya ti mega Chairman ECAC.

Iya mansutka pekara nya dalam jaku pengelalu pengerami bejadika Ethnic Cultural Advisory Council ke diatur KPS ba sebengkah hotel ditu, lemai kemari ti  dipenyadika Sapit Kepala Menteri Datuk Patinggi Tan Sri Alfred Jabu Numpang.

Nambahka nya Mawan mega madahka pengirau ati diri ngagai pemindah peranak menua pesisir ngagai bandar ketegal begigaka pengawa ulih meri pangka negatif ngagai sosio-budaya iya nya, ngeruga jaku asal sekalika chara betulis tauka bejaku.

Ambika banding dalam Jaku Iban empu, ketegal nadai sistem sepil ti sebaka tauka setindit ke ulih dikena semua orang ngujungka meri pangka negatif ngagai jaku nya empu, ku iya.

“Diatu semina bisi sebengkah sistem sepil ti udah ditumbuh sereta dikena sekula, institut pelajar tinggi enggau institut pematih pengajar, tang bedau dikerembaika ngagai semua raban bansa.

“Ketegal nadai sistem sepil ti setindit tau meri awak ngagai Jaku Iban dikeruga sereta penanggul tu balat ngirauka kitai. Lebih agi Jaku Iban dikena dalam bidang penabur enggau pemerindang dalam industri muzik raban bansa Dayak.

“Bisi sekeda orang ti ngaga leka lagu nya enda beratka pemetul leka jaku, patah leka jaku tauka sempama ti dikena ngaga lagu sida,” ku iya seraya nandu sereta ngarapka penumbuh ECAC ulih mantu mutarka penanggul nya.

Kelimpah ari nya Jabu ti mega Menteri Pemansang Menua Pesisir lebuh bejadika ECAC nya madah, penumbuh ECAC nya ulih ngetan, ngelaku sereta ngintu adat enggau main asal sereta jaku dalam mayuh bengkah etnik di negeri tu.

Iya madahka ECAC bejalaika tanggungpengawa besai ngidupka adat enggau jaku etnik di negeri tu.

“Jaku sereta adat enggau main asal kitai beguna amat laban nya bekaul enggau identiti sereta penumbuh bansa kitai dalam Malaysia. Nya alai kitai patut bebendar sereta berakup nyaga, ngintu enggau ngelakuka elemen,” ku iya.

Berebak enggau tu Jabu mega ngarapka ECAC tu ulih berati sereta nyerungkai baru asil simposium ti kala diatur kenyau ari taun 1998 nyentuk ke diatu.

Sama datai ba pengerami nya, bini Jabu, Dato Sri Empiang Jabu, Menteri Muda Perengka Guna Mensia Mayuh Datuk Dr. Stephen Rundi, Menteri Muda Pengintu Pengelantang Robert Lawson Chuat enggau ke bukai.