KUCHING: Peminta lun kena numbuhka dagang ungkup raban Bumiputera nengah Unit Peneraju Agenda Bumiputera (TERAJU) ari ‘Usahawan Permulaan Bumiputera (SUPERB)’ nerima timbal ke manah kandang tiga bulan penudi taun tu.
Direktor Kanan TERAJU (pampang Pengawa Dagang/Pemansang Orang Dagang) Megat M. Yatim Megat Hamid madah, nangkan taun tu ila, betatika bajet ti diberi Perintah Besai RM100 juta, ke taun baru tu kena mantu bansa Bumiputera ngaga pengawa dagang, dikarapka deka nerima mayuh agi timbal ari Bumiputera Sarawak, ku iya.
“Kami berasai temegah ati ari timbal ti diterima kami, chukup manah kelebih agi ba program Superb.
“Peminta diterima ari orang Sarawak jauh manah enti dibanding enggau suku keterubah (27 peminta), kedua (16) enggau ketiga (7). Sekali tu ke Q4 bisi 32, ke pengabis mayuh naka tu, nambah tiga kali lipat,” ku iya madah maya dikerandau ulih pemberita ari Utusan Borneo ditu, ensana.
Kandang setaun ke udah, nyengkaum Q4 diatu, penyampau peminta geran TERAJU manggai urung 3,970, alai ari pemayuh nya, 47 dipilih nyadi pemenang geran tu, ke udah nengah proses minta, mantai penemu tauka perambu pengawa dagang ke deka digaga sida iya, kem sereta sekeda pengawa latih bukai.
“Kami enggai meda orang dagang ngalahka diri, laban palan bisi disediaka kami. Enti sida iya enda kena pilih diatu, sida iya tau nguji masuk baru. Semina sida iya diasuh betatika penemu sereta meri fokus sida iya ngagai penemu nya ngambika perambu sida iya lagi dipeda praktikal agi, lalu ulih ngemujurka sida iya,” ku iya.
Ku iya, nitihka prosedur, semua peminta TERAJU nya deka dipansik, lalu sekeda peminta ke enda nitihka atur kedeka baka umur, perambu pengawa dagang sereta pekara bukai enda diterima tang agi ulih disangkung nengah program bukai.
“Baka diatu, kami bisi ngatur semua penyerta ke bisi minta geran TERAJU, diasuh betemu enggau kami lalu mantaika perambu pengawa dagang ti deka digaga sida ba mua panel akim kami.
“Barang perambu pengawa dagang ti digaga ulih orang dagang Bumiputera ke minta geran tu, taja pan sida iya baru iya kala ngaga pengawa dagang, runding sida iya, iya ulih disukung nengah inisiatif ti digaga sida.
“Pengawa kami nyukung sida iya, ba renggat tu begunaka runding sereta betatika bansa dagang ke deka digaga sida. Nya pengawa kami, mantu penyereta,” ku iya.
“Kami deka meri sida iya pemungkal palan. Barang penemu kemisi sida iya, kami beratika bala nembiak tu bisi peluang nyadi orang dagang ke mujur. Kami deka nyendiaka pemungkal palan tu ke sida iya, ngambika sida iya arapka diri empu (confidence).
“Barang penemu tauka runding bala nembiak tu, deka nyadi perambu pengawa dagang sida iya, kelebih agi sida ke mujur,” ku iya.
Manggai taun 2015 tu ila, proses TERAJU Superb deka dipansik baru, ngambika prosedur nya dipeda praktikal agi, lalu ungkup ti diberi Perintah RM30 juta setaun kena mantu orang dagang Bumiputera (ungkup seiku-seiku manggai RM500,000.00 kena sida berengkah ngaga pengawa dagang).
“Tagit kami ke taun baru tu ila, agi mengkang 6 iku pemenang dipilih ba Program Superb tu. Reti nya dalam kandang tiga taun, 2014/2015/2016 bisi RM100 juta, lalu mungkur 60 pemenang (urung 60 setaun),” ku iya.
Program ‘Usahawan Permulaan Bumiputera (SUPERB)’ dipunka kena 27 Januari taun tu, alai pemungkal suba, TERAJU nerima urung 30 penyereta ari Sarawak ba siri keterubah (Q1).