Dikarang Jacqueline David //
Kelvin Chai enggau Agsempher Manyud ke bela bisi penimpang ari SK Pendidikan Khas nyulut ba UPSR
DIKEMEGAH: Fatimah ngaul seiku nembiak OKU ke nyulut, Agsempher anak Manyud ari SK Pendidikan Khas (B) Kuching (dua kanan), ke disempulang pengajar iya (kanan), apai, indai enggau menyadi iya.
KUCHING: Tiap iku nembiak ke besekula, enda ngira sida normal fizikal tauka bisi penimpang (OKU), semua sebaka, bisi hak belajar.
Menteri Pengintu Pengelantang Pendiau, Orang Indu enggau Pemansang Ruang Bilik, Datuk Fatimah Abdullah madah, semua nembiak bisi hak belajar, nyengkaum sida ‘khas’, nya kebuah dalam sistem pelajar bisi sekula ‘khas’ ungkup nembiak buta tauka bengal.
“Lebuh di sekula, sida diajar nitihka penyelai tauka penanggul ke ditapi, sida bepeluang belajar sereta ngambi peresa baka nembiak bukai, taja pan sida iya diberi timpuh ke lama mimit sebedau ngambi peresa.
“Dalam peresa, nembiak OKU diberi timpuh ke panjai mimit dibanding enggau nembiak biasa tang taja pia, semua tanya dalam peresa nya sebaka magang…Nadai pilih,” ku Faitimah.
Iya madah munyi nya lebuh nguluka dua iku nembiak OKU, Kelvin Chai Jiun Hau ari SK Pendidikan Khas (P) Samarahan enggau Agsempher anak Manyud ari SK Pendidikan Khas (B) Kuching ke nyulut ba peresa UPSR, diinterviu pemberita pengudah Fatimah bejadika atur pengawa ‘Analisis Keputusan Ujian Pencapaian Sekolah rendah (UPSR) 2014’ di Auditorium Opis Pelajar Menua Sarawak (JPNS) ditu, kemari, ke bela digulu Direktor JPNS Serina Sauni.
Fatimah muji japai kededua nembiak OKU tu ti dipadah, japai ke nyulut bendar.
“Ngarapka kita ila deka terus nyapai pemutus peresa ke manah, datai ba renggat universiti, lalu bulih pengawa, nyadi chunto ngagai orang bukai, ngagai bala menyadi, kaban belayan, ngambika sida pan deka nunda penyulut kita,” ku iya seraya madah, nembiak ‘khas’ baka tu mega deka disengkaum dalam Perambu Strategik Pemun Pelajar Anak Mit, ke dikumbai ‘Access Equity’ ngagai semua nembiak.
Agsempher tauka nama pandak di rumah ‘adik’, 12 ari SK Pendidikan Khas (B) Kuching bulih 1A/2B/2C (siti ari sabjek iya bulih B iya nya Bahasa Melayu), anak tuai seiku deriba lori Manyud anak Sikoi enggau Alim anak Nisir, kerani ba sebuah kompeni korporat, sereta anak tuai ari dua iku diri menyadi milih diau ba buding begulai enggau nembiak bukai, ngambika sama ngasaika pendiau normal baka nembiak bukai, ke bisi hak bekaling sereta belajar ngatika diri taja pan rabun.
“Aku bepeluang belajar maya bisi ‘Kelas tambahan’, mayuh kaling diau di buding sama enggau aku, tambah kami sama-sama ulih begulai belajar enggau pangan diri….Rindu diau di buding,” ku Agsempher.
Nitih jaku indai Agsempher, anak iya endang ari ada betapi enggau penyakit ‘Rabun Kritikal’, lalu berengkah ari nya, anak lelaki nya seruran dibai betemu enggau pakar mata di sepital.
“Taja pan anak aku enda meda, tang aku seruran meransang iya, enti orang bukai ulih ngaga pekara nya, kitai pan ulih. Anang sesekali alah laban orang, ukai ketegal penimpang nya kitai lalu deka alah,” ku Alim lalu nambah, kebuah anak lelaki iya diau di buding laban dilalau pengajar Pendidikan Khas, ngambika iya belajar bekaling enggau orang bukai sereta sama belajar enggau sida iya, kelimpah ari belajar ngatika diri.
Jerstein Glence Simon anak Jerry ari sekula SK Satria Jaya, anak seiku pengajar, taja pan enda enda sama penimpang fizikal enggau Agsempher, iya enda nyangka bulih pemutus peresa UPSR 5A.
“Aku enda nyangka bulih 5A, taja pan aku seruran besampi ngagai Tuhan ngambika aku bulih pemutus peresa ke manah. Lebuh aku muka sarung surat, aku meda 5A. Wow……Enda nemu nyebut agi bakani pengaga ati.
“Chara ngemujurka diri, jam belajar enggau bemain sama bansi tang maya dalam kelas, bebendar agi belajar. Enti enda entu mereti nama utai ku pengajar, tau nanya sida iya baru dataika aku mereti,” ku Jirsten ke rindu bemain bol sereta deka nyadi lutur jemah ila.