Ulah ti enda menuku ukai semina ngenusah pengidup dudi hari tang mega tau ngemaluka diri sebilik
SRI AMAN: Raban nembiak dilalau ngenyauhka diri awakka enda mudah teparuk enggau penanggul rama (pengawa jai) baka gian dadah, nginsap gam, gangsterisme, enchuri, ngeruntun, ngerumpak enggau mayuh agi ke bukai laban semua nya ulih ngenusah diri sereta ngemalu diri sebilik.
Kaban Kunsil Nengeri (ADUN) Lingga, Simoi Peri madah, pekara baka nya ukai semina ngenusah pengidup sida dudi hari tang mega tau ngemaluka nama sida sebilik.
Nya alai, raban nembiak patut nyeliahka diri ari teparuk enggau raban orang ke nguji mai sida ngereja ulah ke enda menuku laban sida semina patut ngerundingka pekara pelajar enggau utai bukai ke lebih beguna.
Iya madah munyi nya rambau Program Kembara Amal Belia 3.0 2014 ke diatur ABIM begulai enggau Opis Nembiak enggau Lumba Sukan Nengeri Sarawak bepalan ba Dewan Serbaguna, Kampung Hilir ditu, empai lama ke udah.
Nangkan nya, raban nembiak endang keresa menua ke berega, sida ngesan tanggungpengawa ke besai alai mai pemujur ngagai bansa enggau menua.
“Kita tu peturun ke ngiring menua dudi hari lalu kita mega deka nyadi ketuai ke nampung pemansang menua kitai jemah,” ku iya.
Nya alai, ku iya genap raban nembiak patut ngembuan runding sayau ke menua, berani besemekih, ngembuan pemanah ulah, kelimpah ngembuan juluk ke terang dikena ngemansangka diri, diri sebilik, raban bansa enggau pengarap diri.
Kira 60 iku raban nembiak ari nengeri Sarawak enggau Semenanjung bisi nyereta program Kembara nya ke berengkah ari Kuching nuju menua Miri lalu tembu kena 30 November tu.