Penerang insiden lombong nya dipending seharitu

0

Kabinet nengeri deka diterangka pasal penyadi lombong arang batu di Selantik ti meletup nya

Dikarang Rengenyan Labang //

KUCHING: Kabinet negeri seharitu (Hari Lima) deka mendingka penerang ari Menteri Pengatur Pemansang Pengeraja Asal enggau Rampa Menua II bekaul enggau insiden penusah lombong arang batu di Selantik, apin lama ke udah.

Awang Tengah ti mega Menteri Pemansang Industri madahka Opis Mineral dan Geosains sereta beberapa ejensi ti bekaul udah bejalaika pansik ba insiden nya.

“Aku udah minta ngambika lombong nya diketuka dulu. Opis Mineral dan Geosains sereta beberapa ejensi bukai ti bekaul udah sereta benung bejalaika pansik pasal insiden tu.

“Maya aum Hari Lima tu (seharitu), aku deka meri penerang pasal insiden tu ngagai kabinet negeri,” ku iya lebuh ditanya bekaul enggau insiden lombong arang batu di Selantik ke meletup apin lama tu tadi.

Nitihku iya, pansik ke dipejalaika nya nyengkaum  mansik bakani sereta nama kebuah penusah nya nyadi, laban nya nabanka nyawa sekeda pengereja pengawa lombong nya.

Ku iya, asil pansik deka nentuka nama bagi ukum tauka atur ti deka dipejalaika ngagai pengempu lombong nya.

“Kitai meda dulu bakani asil ari pansik ke dipejalaika lalu kitai mega deka nentuka nama kebuah ke bendar insiden nya nyadi sekalika sida nitihka SOP (Standard Prosedur Operasi) tauka enda, sereta ngemeratka pengelikun pengereja pengawa enda,” ku iya.

Dulu ari nya Awang Tengah nyuaka surat pala tanah ngagai peranak Kampung Sungai Lumut ti diatur ba Majlis Penyerahan Surat Hak Milik Tanah Seksyen 18 Bagi Kampung Sungai Lumut, Kuching ti diatur Opis Tanah enggau Survei ba Auditorium Yayasan Sarawak ditu, kemari.