KUALA LUMPUR: Perintah deka ngaduka rega minyak ungkup petrol RON95 menua tu sebaka enggau rega minyak dunya sebedau atur ngelimat belanja dipejalai berengkah 1 Dis, ku Sapit Menteri Wang Datuk Ahmad Maslan.
Iya berasai andal enggau atur ngelimat belanja ungkup minyak petrol RON95 deka meri pemaik ngagai rayat laban rega minyak nya lebih murah berindik ari rega minyak dunya ke udah nurun.
“Aku ditusuika rega kamit dunya ungkup RON95 dipelaba deka nurun dalam beberapa hari lalu naka sehari tu (27 Nov) rega iya RM2.26 seliter iya nya lebih murah ari rega RM2.30 ke dijual diatu.
“Rega nya dipelabaka mahak nurun lalu kami bedanji deka ngaduka rega tu sebedau 1 Dis,” ku iya ba sebengkah aum pengarang berita kemari.
Kena Hari Lima minggu nyin kemari, Menteri Dagang Dalam Nengeri, Koperasyen enggau Pekara Bebeli Barang (KPDNKK), Datuk Seri Hasan Malek madahka perintah deka netapka rega renchit ungkup minyak RON95 enggau diesel nitihka atur ngelimat belanja berengkah 1 Dis.
Kenu ku Hasan, sabsidi ungkup RON95 deka dikemadu lalu rega minyak deka nitihka rega ba makit dunya. — Bernama