KUCHING: Bungkur internet lebih agi ba sekula menua pesisir patut dikemanahka ngambika juluk ngena ‘Buku Teks Digital Interaktif Pintar’ ti dipelabaka berengkah dipejalaika ba taun 2016, meri pangka engkeman ngagai semua nembiak sekula.
Presiden Gerempung Pengajar Bumiputera Sarawak (KGBS) Ahmad Malie ngarapka perintah beratka menua tu lebih agi di menua pesisir serap dibungkur internet awakka semua nembiak nyengkaum di menua pesisir sama ngasaika transformasyen nya.
Iya madahka KBGS endang nyukung penemu enggau pemutus Opis Menteri Pelajar Malaysia (KPM) ti mai transformasyen bup teks ngagai chara digital interaktif.
“KGBS nerima manah atur KPM ti deka bejalaika Buku Teks Digital Interaktif Pintar. Chara tu senipak bendar enggau transformasyen pelajar ti chakah dipejalaika nengah PPPM(Pelan Pembangunan Pendidikan Malaysia) ti udah berengkah dipejalaika taun nyin ensana.
“Dalam atur pengawa KPM ti deka mai transformasyen buku teks ngagai chara digital interaktif, KGBS mega minta sereta ngarapka bungkur internet ke agi lemi patut dikemanahka agi enggau jampat ngambika senipak enggau transformasyen buku teks ngagai digital enggau interaktif pintar.
“Nengah kapasiti bungkur internet ti tampak sereta manah, KGBS arap sereta pechaya Buku Teks Digital Interaktif Pintar tu deka meri impak ti lebih manah kelimpah ari ulih narit pengerindu nembiak deka belajar ngena bup teks ti senipak enggau era sida ngulihka penemu,” ku iya madah ngagai Utusan Borneo.
Bejaku baru iya madahka Buku Teks Digital Interaktif Pintar diatu senipak bendar dipejalaika berindik ari bala nembiak kemaya hari tu lebih ‘bebakih IT’ sereta rindu agi ngiga pekara ti dipelajar nengah internet.
“Nengah transformasi buku teks konvensional ngagai buku teks digital pintar, KGBS arap bendar chara tu ulih narit sereta nambah pengerindu nembiak belajar sereta maya nandu pelajar nengah bup teks digital pintar,” ku iya seraya madahka raban nembiak kemayahari tu pintar ngena literasi IT enggau manah.
Apin lama, Opis Menteri Pelajar deka bejadika Buku Teks Digital Interaktif Pintar, gelombang kedua inovasi enggau transformasyen buku teks digital, ti dipelaba dipejalaika berengkah taun 2016 ngagai 2025.
Sapit Menteri Besai Tan Sri Muhyiddin Yassin madahka nya sambung ari gelombang keterubah transformasyen buku teks sepenyampau 313 judul, ke diatu ulih di akses nembiak, pengajar enggau apai indai nengah laman 1BestariNet.
Muhyiddin ti mega Menteri Pelajar madahka nengah Buku Teks Digital Interaktif Pintar, proses belajar, ngajar, kolaborasi enggau pentadbiran deka dipejalaika nengah ‘persekitaran pembelajaran maya’ (VLE).
Inovasi nya mega entara chara opis menteri pelajar mutarka isu beg sekula berat ti selalu nyadi sebana apai indai sebedau tu, ku Muhyiddin.