KUCHING: Penyerakup, pengelantang enggau pemaik ke dikemeran sereta dikemeratka raban bansa Sarawak patut bendar dibantaika nengah asil seni.
Menteri Dagang Temuai Datuk Amar Abang Johari Tun Openg madahka raban pelukis, artis lama tauka baru ari menua luar enggau peranak menua tu patut bisi inspirasyen ari pemanah rampa menua sereta pemaik enggau pengelantang nengeri tu ngaga nya nyadi asil seni.
“Sarawak diuan mayuh pupu raban bansa ti ngemeran sereta ngemeratka penyerakup, pemaik enggau pengelantang patut ulih nyadi inspirasyen raban artis seni lalu dibantaika nengah asil seni tauka asil ke didero.
“Kitai meransang sereta ngarapka raban artis dalam bidang seni lebih agi ke baru (dalam bidang tu) mantaika pengelandik enggau kreativiti nero bepelasarka pemanah rampa menua, penyerakup, pemaik enggau pengelantang lalu dibantaika nengah asil seni tauka lukisan.
“Laban enti artis tu landik nero dia pesan tauka penerang baka pasal penyerakup, pemaik enggau pengelantang di menua tu ulih diperati sereta diperetika nengah asil seni tauka asil ke didero,” ku iya.
Abang Johari mansutka pekara nya lebuh ti bejadika Sarawak Closed Art Exhibition 2014, ti diatur National Visual Art Gallery begulai enggau Opis Menteri Main Asal enggau Dagang Temuai sereta Galleria ba Galleria Art Gallery ditu, lemai kemari.
Pengawa pemandang nya berengkah dipejalaika kemari 28 November ngagai 31 Disember 2014 sereta dibuka ngagai mensia mayuh ari pukul 8.30 pagi nyentuk pukul 5 lemai ninting Hari Satu ngagai Hari Lima.
Ba jaku pengelalu, Dato Taib Ali ke mega Kaban Kaunsil National Visual Art Gallery madah, pengawa pemandang nya keterubah endar diatur nyerumba Taun Nemuai Malaysia 2014 di Sarawak.
Iya ngarapka mayuh agi program ti sebaka ulih diatur di nengeri tu laban nya ulih nyaup nyungkak industri dagang temuai.
“Kitai ngarapka udah tu ila mayuh agi program bekaul enggau asil seni diatu laban asil seni tu mega ulih nyadi penarit dalam industri dagang temuai sereta ulih ngangkatka ekonomi menua.
“Ba pengawa pemandang tu mega asil seni tauka asil ke didero bisi dijual lalu 10 peratus ari rega nya deka diberi ke pengasih ngagai gerempung,” ku iya seraya minta ejensi perintah meri sukung ngagai program jemah ila.
Ba Galleria nya iya madahka bisi 70 asil seni ari 36 iku pelukis peranak menua tu enggau menua tasik.
Galleria Art Gallery iya nya ba Wesberly House, Suite 1-3, Lot 2812, Block 195, Rubber Road West, serete penerang silik pasal pemandang enggau Galleria tau dipeda ba www.wesberly.com.my tauka betelefon ngagai lumur 016 – 886 5287.