KUCHING: Majlis Daerah Sri Aman (MDSA) dipinta anang bechiping enggau bala pedagang ke bejualka sayur enggau asil kampung ninting hari ba makit Sri Aman.
Chairman DAP Pampang Sri Aman Leon Jimat Donald madah, iya bisi nerima sebana ari sida ke bejual ninting hari nya ti ngasaika diri ditempayaka MDSA laban nadai disedia palan bejual ke menyana.
Ku iya, nitihka sebana ari bala pedagang lebuh iya ke ngabas ngagai makit nya, MDSA dipeda baka ngemeratka agi orang ke bejual dagin enggau telu ti majakka diri ngagai palan bejual asil kampung nya.
“Sida patut enda ngengkahka utai ke dijual sida ngampar belapikka tikai getah ba semin enggaika sayur sida kamah ke lebih agi maya pengujan diatu. Dia dipeda baka ke nadai sistem ti meruan dipejalaika MDSA magi palan endur ngagai bala pedagang di makit nya.
“Sida kaunsil patut nyendia palan ke menyana ungkup orang ke bejual ninting hari laban sida bisi mayar suwa ninting hari. Taja pan MDSA bisi nerima suwa ninting ari ari bala pedagang nya, sida enda nemu nama kebuah kaunsil enda ulih nyendiaka penyikap perengkaguna ti menyana agi ke sida ngelama tu. Aku udah nulis surat minta kaunsil nerang sereta ngiga chara mutarka penanggul ti ditapi bala pedagang nya,” pia ku Leon ke mega Mandal Chairman DAP Sarawak.
Ku iya, penanggul ke nyadi dia majak balat laban bala pedagang nyau belaya berebutka palan endur bejual kenyau ari minggu seiti nyin tadi.
Ketegal palan nya ke majak sekut laban pedagang ti bejualka dagin enggau telu, bisi mega sekeda bala pedagang nya sebana madahka mija enggau kutak sida diambi bala pemesai MDSA ngambika bisi awak endur bala bukai bejual, ku iya.