KUCHING: Karnival Pengawa Nyumpit Sarawak deka diatur besai agi berengkah taun ke deka datai ngambika ulih matak penyereta ari serata dunya.
Pengudah karnival dua hari berunggu nya tembu diatur di Le Park ditu Hari Minggu tu tadi, pekit nyumpit nya mega diatur dikena ngansah penyereta ke pemadu manah di Borneo.
“Karnival tu nyadi palan ke pemadu manah endur kitai ngempuruka raban Borneo ke bisi di Kuching ditu kelimpah ti ngerapitka kaul begulai enggau pangan diri,”ku Sapit Presiden Sarawak Dayak National Union (SDNU) Datuk Alexander Nanta Linggi rambau pengawa nyuaka perais ba seiti restauran ditu, malam ensanus.
Iya madah pekara menang tauka alah ba pekit nya ukai seiti pekara ti dikemerat tang iya ke pemadu beguna iya nya semua 89 iku penyereta ti datai ari Sarawak enggau Kalimantan Barat udah mandangka semengat ti kering.
Nanta ti ngarika Menteri Pemansang Rama ke mega Presiden SDNU Tan Sri William Mawan Ikom nambah, mayuh agi program ngelaku pekit deka diadu sebedau pekit nya diatur baru ba taun ti deka datai.
Ba pekit nya, champian ungkup ketegori lelaki bediri pulai ngagai Bong Chon Kui ti ngarika SDNU Sarawak lalu lumur dua pulai ngagai Lahan Suhaili ari tim 6th D Blowpipers lalu ditankanka Paul Sawai ari Urau Tutoh ba penuduk lumur tiga.
Ungkup kategori Lelaki (nyerungkung) gelar champian dipenggi Badun Nakas (Team Menyumpit Bau), lumur dua Meli Tintang (Raja Remong, Kota Samarahan) lalu ditankanka Poria Abun (SDNU Sarawak) ba lumur tiga.
Ba Kategori Orang Indu (bediri), lumur satu pulai ngagai Benone Akim (SDNU Sarawak), ditangkanka Linda Kiat (Team Menyumpit Bau) sereta Maria Ho (Raja Remong, Kota Samarahan).
Udah nya, ba kategori Orang Indu (nyerungkung), gelar champian dipenggi Sophia Tunjin (6th D Blowpipers), lumur dua Inda Ahoi (Raja Remong, Kota Samarahan) lalu lumur tiga pulai ngagai Tepi Mata (Team Menyumpit Bau).
Ba tiap empat kategori tu, bala pemenang nerima perais duit RM500, RM400 enggau RM300.
Ungkup kategori lelaki beraban dua iku, Orang Indu enggau bechampur lelaki-Orang Indu, champian nerima RM1000, lumur dua RM800 lalu RM600 ungkup lumur tiga.
Pemenang kategori lelaki beraban dipenggi Mohamad Asky enggau Blisi Langai (Urau Tutuh) lalu ditangkanka Gordon Minggan enggau Nelson George Lansam (SDNU Sarawak) ba penuduk lumur dua, penuduk lumur tiga pulai ngagai Leo Dedy Anjiu enggau Benny Budi Anjiu (Sekberkesda Kalbar Indonesia).
Ungkup kategori beraban Orang Indu, gelar champian pulai ngagai Magdalene Dominic enggau Mahani Adam (Team Menyumpit Bau), lumur dua diempu Julida Juin enggau Mariam Sabai (SDNU Sarawak) lalu Edah Abat enggau Anita Gabriel (6th D Blowpipers) ba penuduk lumur tiga.
Pemenang ba kategori champur lelaki-Indu, gelar champian dipenggi Paul Tuah enggau Imbau Leo (6th D Blowpipers) ditangkanka Poria Abun enggau Benone Akim (SDNU Sarawak) lalu lumur tiga pulai ngagai Badun Nakas enggau Tepi Mata (Team Menyumpit Bau).
Kelimpah ari nya, gelar kumang pulai ngagai Benone Akim lalu iya nerima perais RM1,000.
Gelar keling pulai ngagai Badun Nakas ke bela nerima perais RM1,000.
Karnival diatur Opis Menteri Pemansang Rama nengah kerejasama SDNU enggau Opis Dagang Temuai Malaysia.