KEDUA KALI NYADI PEMANGKU: Asfia besumpah mangku tanggungpengawa nyadi TYT ba mua Adenan (duduk, kiba) enggau Supang (kanan). — Gambar Penerangan
KUCHING: Speaker Dewan Undangan Negeri (DUN) Datuk Amar Mohamad Asfia Awang Nasar besumpah mangku tanggungpengawa nyadi Tuai Pemegai Menua (TYT) berengkah kemari 11 Disember nyentuk 9 Januari 2015 tu ila.
Pengawa besumpah nya dikemata Kepala Menteri Datuk Patinggi Tan Sri Adenan Satem enggau akim Kot Tinggi Sabah enggau Sarawak Supang Lian ba pengerami ke diatur di Lapau Begunan DUN ditu, ku sebengkah penerang berita.
Dulu agi ari nya, Adenan macha surat chiri ari Yang Di-Pertuan Agong Tuanku Abdul Halim Mu’adzam Shah sebedau Asfia nyain surat nya.
Enggau atur nya, Asfia udah kedua kali diangkat nyadi pemangku TYT ke alai keterubah iya mangku iya nya kena 29 Disember 2011.
Tembu pengawa, Asfia nerima tabi basa ari seraban 55 iku polis ti betuaika ASP Rozi Yusop ari Pasukan Gerak Am (PGA) Batu Kawa.
Tuai Pemegai Menua Tun Pehin Sri Abdul Taib Mahmud diatu benung pemisi pengelama timpuh nya.
Bela datai bini Asfia, Datin Amar Fatimah Mohd Iskandar, bini Adenan Datin Patinggi Dato Jamilah Anu, Menteri Pemasang Rama Tan Sri William Mawan Ikom enggau bini iya Puan Sri Julia Mawan.