Pendiau rumah panjai lama patut dijaga enggau manah laban nya aja pesaka ke pemadu berega
SRI AMAN: Penyelai enggau pemanah gaya rumah panjai ti bepelasarka pendiau rumah panjai lama enggau moden di nengeri tu seruran matak ati bala temuai ari menua luar enggau dalam menua tu datai raun ke rumah panjai di nengeri tu.
Menteri Muda Pengawa Berumah, Datuk Francis Harden Hollis madah, pendiau rumah panjai lama di nengeri tu patut ditan laban nya aja pesaka ke pemadu berega ngagai rumah panjai ke bekaul.
Nangkan ke nya, ku iya taja pan opis menteri pengawa berumah Sarawak bisi nyendiaka sebengkah pakej baru ungkup ngelon rumah panjai ke dikumbai ‘Pakej Pinjaman Perumahan Rumah Panjang Mesra Rakyat’ ba pun taun tu tang pendiau asal rumah panjai nya patut mengkang ditan.
“Taja pan rumah panjai ke deka digaga nengah ‘Pakej Rumah Panjang Mesra Rakyat’ tang kitai deka meda pendiau asal rumah panjai nya ditan laban nya pesaka ke pemadu berega.
“Kebuah pia, temuai ari luar enggau dalam menua tu rindu agi raun ngagai rumah panjai di Sarawak tu laban sida empu rinduka penyelai rumah panjai lama di nengeri tu taja pan mayuh rumah panjai diatu udah digaga moden,” ku iya.
Iya ti mega Kaban Kunsil Nengeri (ADUN) Simanggang madah munyi nya rambau Program Penemuai iya ke Rumah Abang Akun, Kampung Kedang, ditu kemari.
Kenu ku Harden, ‘Pakej Pinjaman Perumahan Rumah Panjang Mesra Rakyat’ ke udah dipejalaika perintah taun tu endang sebengkah ari sekim baru lon rumah panjai ke udah dikemendarka Opis Menteri Pengawa Berumah.
“Opis Menteri mega udah ngemendarka agih belanja ‘Pilot Project’ nengah sekim tu ke beungkus RM2 juta ungkup Rumah Collin di Miri ba pun taun tu,” ku iya.
Nitihka penerang, pelin rumah panjai baru nya bechuanaka konsep baru iya sebuah rumah panjai enda tau kurang ari 10 pintu, taba rumah panjai mega deka disukut lalu diberi nama ungkup sepintu bilik.
“Ungkus sepintu buluk deka nitihka pelin disediaka Housing Development Corporation (HDC) ke nyerangkung tiga bilik tinduk, ruai, bilik besai, dapur enggau agu.
“Ungkus mega udah ditetapka antara RM70,000 nyentuk RM100,000 lalu timpuh mayar utang nya pulai ditetapka 25 taun. Udah nya pendiau rumah baka rumah batu lalu digaga malai,” ku iya.
Nya alai, Harden nesau peranak rumah panjai di nengeri tu anang muai peluang endur minta lon tu ngambika tau meri penguntung ngagai sida ke deka ngentak rumah panjai baru.
Sama bisi datai ba program tu Ketuai Indu Parti Sa’ati Rayat Sarawak (SUPP) Simanggang, Ling Siew Hung, Mandal Chairman Nembiak SUPP Simanggang, Patrick Micheal Malajin, Kaunsilor Andar Suntai, Tuai Rumah Japing ari Kampung Nyakai sereta bala ke bukai.
Berebak enggau nya mega, Harden bisi nyuaka geran perintah penyampau RM8,000 ungkup JKKK Rumah Abang dikena sida bejalaika program sepanjai taun.