Harden: Rayat enda patut malu ngenataika peminta

0

Enti bisi ari sida sebilik napi penanggul, enda dapat, ditepan penyakit, padah ngagai pengari rayat ngambi tau diperunding

NGABAS RAYAT: Harden (tengah) ngabas dua iku diri menyadi ke ngembuan penyakit bajung di Taman Belimbing ditu seraya dikemataka Andar (kiba), Sii (dua kiba), Kuek (tiga kiba) sereta bala pemesai raban bansa China bukai maya penemuai nya.

SRI AMAN: Kaban Kunsil Nengeri (ADUN) sitak Simanggang, Datuk Francis Harden Hollis minta barang sapa ari sida sebilik ti begunaka bantu perintah, ngenataika pekara nya ngagai pengari rayat ke megai menua sida tauka sebarang ejensi perintah ke patut.

Ku iya, enti nyema pakara tu enda dikemanjaika ngagai pengari rayat sereta enda diterangka enggau silik ngagai rayat, sida deka jauh tinggal ari sebarang informesyen ke benguna kelimpah ari laun nerima sebarang bantu ari perintah.

Berindik ari pekara tu, aku ngarapka semua rayat di menua tu nyengkaum ketuai raban bansa di semua kandang pendiau ngambi ngenataika setiap informesyen ke beguna ngagai pengari rayat tauka ejensi perintah ke ngempu tanggungpengawa.

Harden ke mega Menteri Muda Pemansang Menua Pesisir enggau Pengawa Berumah Sarawak mansutka jaku nya pengudah ditanya raban pemeberita ba awak pengarang berita beserimbai enggau penemuai iya ngagai sebuah ruang bilik ke alai lima iku diri menyadi dalam ruang bilik nya ngembuan penyakit bajung di Taman Belimbing, Sri Aman ditu, pagi kemari.

Ku iya nandu, dalam pekara tu, ruang bilik ke ngembuan mayuh diri sebilik ke begunaka bantu enda patut malu ngenatika penanggul ke ditapi ngagai pengari rayat di alai sida diau ngambika muntang diberi bantu.

“Lengkaka ulah ke udu malu, anang sekekali malu betanya ngagai ejensi perintah lebuh ngenataika peminta bantu,” ku iya.

Nya alai, ku iya, enti sema ruang bilik nya enda bulih bantu ke dipinta ketegal sekeda penanggul, perintah deka nguji ngiga sebarang bantu ke tau diberi ngagai sida.

“Pemadu beguna, ruang bilik nya empu patut madah ngagai ejensi perintah ke udah dipadu bejalaika tanggungpengawa ngambika bantu ulih diberi enggau lengkas sereta nadai penanggul,” ku iya nandu.

Sama bisi datai ngulu atur pengawa nya, Temenggung Sii Toh Peng, Pengulu Lee Siang Hua, Kapitan Kuek Aik Seng, Kapitan Kiew Siew Teck, Kaunsilor Andar Suntai sereta bala tuai raban bansa China ke bukai.