JKJR ngemeratka pengelikun penguna jalai alun

0

TU LIKUN TAUKA ENDA: Manyin meda pengelikun taya kerita ti bisi dipandangka maya pemandang Program Kimpin Pengelikun Jalai Alun beserimbai enggau Hari Krismas 2014, ke diatur ba Dewan Mensia Mayuh Serian, ke sama digulu ADUN Kedup Martin Ben (dua kanan) enggau Davina (dua kiba).

SERIAN: Kimpin ke bekaul enggau pengelikun jalai alun sebengkah ari pengawa rama ke suah endar dipejalaika Opis Pengelikun Jalai Alun (JKJR) dalam kandang setaun, pengabis nadai lima kali ke lebih agi maya bisi ngintu hari pengerami ke besai Hari Raya, Taun Baru China, Gawai Dayak, Deepavali, Krismas enggau maya kemisi sekula.

Menteri Pemansang Infrastruktur enggau Penyambung, Dato Sri Michael Manyin Jawong madah, nengah penyuah kimpin ti dipejalaika, nya enda ulih ngurangka pemayuh kes bebadi di jalai alun.

“Kimpin tu udah dipejalai lebih ari 10 taun tang dalam timpuh nya, asil iya enda tentu manah endar laban pemayuh kes bebadi ba jalai alun mengkang tinggi,” ku Manyin.

Iya bejaku munyi tu ba Program Kimpin Pengelikun Jalai Alun beserimbai enggau Hari Krismas 2014, di Dewan Masyarakat Serian ditu, kemari.

Iya madah, jalai alun di menua tu agi ba tikas ke kurang setindit enti dibanding enggau jalai alun di semenanjung, taja pia ku iya,nitihka pansik polis, 65 peratus penusah bebadi jalai alun endang bepun ari penyalah mensia empu.

“Nitih statistik polis, pemayuh kes bebadi jalai nya nyadi ba jalai ke lurus maya hari ti manah. Ari pansik nya, diperatika orang ke deriba kerita nya dipelaba kelalu laju tauka lelak maya deriba kerita sereta enda bejejaga maya ke deriba,” ku iya.

Iya mega ngelalau polis enggau Opis Perengka Pengangkut Jalai (JPJ) ngemeratka orang ti duduk di penuduk belakang kerita ti enda tau enda ngena ‘tali pinggang keledar’.

Manyin madah, Opis Pengelikun Jalai Alun (JKJR) deka ngemajakka pengawa ngiri penemu ngagai mensia mayuh ke betengahka jalai alun dalam pekara pengelikun, ngambika ulih ngurangka pemayuh kes bebadi di jalai alun.

“Di Malaysia, urung 19 iku bebadi di jalai alun ke mai pengerugi ngagai menua tu laban kitai pan rugi dalam produktiviti ke ulih dikereja pemayuh sida tu,enti sida iya enda bebadi.

“Nitihka statistik Miros, menua tu rugi bejuta ninting taun ketegal penusah bebadi di jalai alun. Sida ke nyau bakal tauka timpang pendiau ketegal nya enda ulih mantu ngangkatka produktiviti menua,” ku iya.

Ku Manyin baru, Gerempung Pengerai Sedunya nagit, manggai ba taun 2020, pemayuh kes bebadi di jalai alun di menua ke ma enda tau enda dikurangka ngagai dua iti kes bebadi ke tetiap 10,000 kerita buah ti direjista.

Nangkan nya, Direktor JKJR Davina Agnes Enteli madah, di Sarawak bisi seiku parai ninting hari ketegal bebadi ba jalai alun.

Menua tu ngerikut urung 362 pemati sereta 170 ke bakal ketegal bebadi di jalai alun (nitihka rikod naka bulan November tu tadi). Miri ngerikut pengabis mayuh kes bebadi ba jalai alun ti ngujungka 52 iku parai,ditangkan enggau Sibu (49 parai), Bintulu (38 parai). Kuching ngerikut 17 pemati dalam timpuh ke sama.

“Bisi sekeda orang madahka penanggul tu nyadi ketegal ulah mensia lebuh nengah jalai alun, enggau tikas pemanah jalai alun.

“Penusah bebadi di jalai alun tu mega nyadi ketegal ulah penguna empu ke enda bejimat sereta peneka ati lebuh mai kerita sida iya. Ulah baka tu patut di ubah ngagai ulah ke positif,” ku Davina.