SIBU: Bala konteriktor ti ngereja pengawa nebas enggau meresi parit dipinta bejalaika pengawa sida enggau manah.
Sekretari Opis Kunsil Menua Sibu (SMC) Hii Chang Kee madah, SMC enda bechiping ngeletak ke ukum ngagai konteriktor ti enda mujur nitihka setindit kereja.
“Kitai ngemeratka tikas kereja konteriktor ti udah dipadu bejalaika sesebengkah pengawa,” pia ku iya madah ngagai pengarang berita.
Ku iya, taun tu SMC udah ngeletakka ukum ngagai beberapa iku konteriktor ti enda bejalaika pengawa enggau manah.
“Taun seiti nyin tadi kitai udah ngemaduka kontrik beberapa iku konteriktor laban sida enda nembuka pengawa nitihka timpuh ti udah diletak,” ku iya nerang.
Enggau awak tu iya minta konteriktor ti udah dipadu ngereja pengawa nebas rumput enggau meresi parit taun 2015 bejalaika pengawa sida enggau manah.
Ba pengawa nebas rumput, ku iya, konteriktor anang enda nebas rumput sepemanjai jalai ambis nadai dua inchi peninggi agi tinggal.
Ku Hii, sida mega ditagang ngerachun rumput.
Berindik ari pekara nya, iya minta mensia mayuh anang sanggu ngeripot ngagai SMC nyema tetemuka konteriktor ti enda mujur ngereja pengawa enggau manah.