SERIAN: Kuching dipilih entara sepuluh buah pelilih menua ti deka disikap ngena perengka pengangkut besabsidi ungkup mensia mayuh.
Menteri Pemansang Infrastruktur enggau Penyambung Dato Sri Michael Manyin Jawong madah, sabsidi nya deka diberi perintah nengah Opis Komisyen Pengangkut Darat ke Mensia Mayuh (SPAD).
Ku iya, consortium tu udah ditumbuhka lima buah kompeni bas di Kuching lalu sida udah meri kelala pejalai mungkur penyauh 500 kilometres di Kuching.
“Di baruh inisiatif tu, bas ke bejalai nengah jalai tu deka diberi sabsidi tiap sekilometer, baik bisi pasinjir tauka enda.
“Ni bagi bas ke bulih sabsidi nya, kompeni bas nya enda tau enda meli bas baru,” ku iya madah ba aum media pengudah bejadika Kimpin Pengelikun Jalai Alun beserimbai enggau Hari Krismas di Dewan Masyarakat Serian, ditu, kemari.
Manyin madah enti nitih, SPAD enggau kompeni bas bulan nyin tadi udah nyain sempekat, tang bedau digaga laban kededua piak benung berundingka kuantum sabsidi ke patut diberi.
“Kami ngarapka servis bas tu ulih dipejalai enti enda tengan taun tauka ujung taun baru tu ila. Enti servis tu berengkah ila, bas deka datai ba stesyen tiap 30 minit,” ku iya lalu ngarapka mayuh agi orang deka milih ngena bas lalu ngurangka pemayuh kerita di jalai alun kelimpah ari ngurangka kes bebadi jalai.
Lebuh ditanya pasal gaya jalai alun di menua tu, Manyin madah, mayuh jalai di menua tu ari baruh setindit dibanding enggau jalai alun di semenanjung.
“Di semenanjung, jalai sida disebut ‘highway’. Kitai ditu nadai highway tang semina jalai alun biasa,” ku iya.
Manyin madah opis Menteri Kereja Raya udah merambu deka ngaga jalai begembar dua Miri ke Kuching sereta Kuching ke Sematan ba renggat keterubah, lalu ari Limbang ke Lawas sereta Sematan ngagai Tanjung Datu ba renggat kedua.
“Nitihka pekara ke diperambuka sida iya, ngarapka kitai nadai betapi sebarang penanggul pemanah jalai alun dalam taun 2021,” ku iya.
Iya mega madah, jalai alun tu nadai ‘toll’ laban nya ukai ‘highway’.
“Iya semina jalai biasa, Indu Jalai Pan Borneo. Kitai enda ulih ngaga ‘toll’ laban mayuh jalai simpang bukai lalu pekara kedua, projek tu dibayar perintah, lalu ketiga, nadai jalai alternatif bukai enti muka ‘toll’,” ku iya.