KAPIT: Lima iku tuai rumah mujur nerima setipikit dichirika nyadi tuai rumah ke disuaka Menteri Pemansang Tanah, Tan Sri Datuk Amar Dr James Jemut Masing ba Kompleks Nengeri Bletih ditu, empai lama ke udah.
Entara sida ke dichirika mangku tanggungpengawa nya, Tuai Rumah (TR) Melintang Tukau, TR Untam Ngalambat, TR Jugah Lioi, TR Seman Japing sereta TR Barang Empawai.
Dalam awak nya, Masing ngenataika pengaga ati sereta meri besai terima kasih ngagai raban tuai rumah ke baru dichiri nya ngambi bejalaika pengawa sida enggau ransing sereta ngemeratka rayat.
Iya minta raban tuai rumah seruran meri sukung ke tegap ngagai perintah sereta nyadika pelasar alar rayat ngenataika sebarang penanggul.
Ku iya, sida tu nyadi mata enggau pending perintah sereta patut ngiri diri ngena mayuh macham pengelandik enggau penau ngambika mujur bejalaika pengawa mantu perintah dalam meri pemansang ngagai rayat kelimpah nyadika pelasar dikena ngenataika sebarang penerang ngagai rayat bekaul enggau sebarang pekara tauka sebarang program ke diatur perintah.
Kelimpah ari nya, Kepala Opis Kaunsil Pelilih Menua Kapit (D.O) Elvis Didit mega ngelalau raban tuai rumah ngambika ransing bejalaika pengawa sereta ngedut kaul ke rapit begulai enggau rayat.
Sama bisi datai ba atur pengawa nya, Residen Kapit Fedrick John George, D.O Pelilih Menua Kapit Elvis Didit, Sekretari Politik Kepala Menteri Wilson Nyabong Ijang, Temenggung Tan Kian Hoo, Pemancha David Dian, Pengulu Sallang Batang, Pengulu Jampi Raweng, Pengulu Stewart Sawing sereta raban bukai.