Nadai salah orang ukai Islam ngena leka jaku ‘Allah’

0

Pengawa Polis Johor ti ngetanka paderi, bup sembiang nya baru salah laban tau ngeruga pengelikun menua

KUCHING: Pengawa Polis Johor ti ngetanka paderi enggau bup sembiang apin lama ke udah, ukai pengawa ke betul, pia ku Menteri Muda ba Opis Kepala Menteri (Pekara Islam), Datuk Daud Abdul Rahman.

Lebuhke dipinta mantaika langgur penemu bekaul enggau pekara nya lebuh ti bejadika ‘Malaysian Entrepreneur Halal Muslim Organisation, (MEHMO) ditu kemari madah, nadai salah orang ukai Islam ngena leka jaku ‘Allah’ lalu pekara ke nyadi di Johor dipelaba ketegal bisi penyaru runding.

“Ba kitai di Sarawak ditu, leka jaku Allah tau dikena orang ukai Islam nya alai penanggul ke nyadi di Johor nya dipelaba bepun ari penyaru runding laban bup sembiang nya besai endar reti ba Orang Asal di Johor.

“Kelimpah ari nya sida (Orang Asal) semina nemu Bahasa Malaysia, nya alai ukai salah salah sida. Bup Kudus ke dikena sida nya dalam jaku Bahasa Malaysia, ke endang asal penatai ari Indonesia, ti nadai ngembuan juluk deka ngemeli tauka nyindir raban Islam,” ku iya.

Ku iya, nya meh ke pengamat iya lalu ukai patut nyadika isu seraya arapka perintah ngenegapka penemu sida ba sentang pekara ke baka nya dikena nyeliahka penyarut nyadi ba pupu raban bansa enggau jalai pengarang di Malaysia tu.

Apin lama ke udah, seiku paderi Katolik, Cyril Mannayagam, 44, di Muar, Johor udah ditan ketegal ngembuan 30 iti laban bup sembiang ke ngundan leka jaku ‘Allah’ ke besai endar reti ba jalai pengarap Keristin Orang Asal.

Iya nganjung bup nya ngambika diphotostat urung pukul 1.00 tengahari kena 5 di sebuah kedai di Tangkak, Johor sereta pulai kia baru deka ngambi bup nya baru empat jam udah nya.

Lebuh iya datai ba kedai nya, lelaki ba kaunter nya madahka dua iku raban polis nganti iya ba luar kedai sereta lalu nangkap sereta mai iya ngagai Balai Polis.

Pengudah beberapa jam ditasat, iya lalu dilepaska tang bup nya mengkang ditanka polis.

Ulah polis di Johor nya udsah ngenyima ati raban komuniti Keristin sereta minta perintah ngukum pemesai polis nya nengah ‘Undang-Undang Hasutan’ laban ulah ke baka nya tau ngenataika penyarut ngagai pupu raban bansa di menua tu.

Ku Daud, nya tepulai ngagai Peguam Menua mutuska sekalika bisi kes ba polis nya.

“Tepulai ngagai Peguam Menua mutuska, nadai jaul enggau kitai. Kitai ngelempaika pekara nya ngagai Peguam Menua nawa sesadsap ke ditemu salah ti tau ngeruga pengelikun menua,” ku iya.