BESAUP: Peranak ari kededua Genturung Pendiau Siol Kandis Iban enggau Melayu bela basaup meresi genturung pendiau sida.
KUCHING: Pengawa besaup beripai meresi kandang rumah diri patut dikemeratka tiap ruang bilik belama kena nyeliahka pengelekai igi penyakit denggi.
Apin lama ke udah, kededua Komiti Pemansang enggau Pengelikun Genturung Pendiau (JKKK) Siol Kandis Iban enggau Siol Kandis Melayu bisi ngatur pengawa beripai meresi kandang rumah diri.
Nitihku penerang ari Tuai Rumah Genturung Pendiau Siol Kandis Alexander Blassan, tuju pengawa beripai nya kena nyaga sereta ngangkatka agi pemeresi kandang rumah.
Iya madah, atur pengawa nya endang patut dikemerat sereta dipejalaika berindik ari pengelekai penyadi kes sakit nyamuk ba genturung pendiau nya.
“Pengawa beripai nya diatur laban seminggu sebedau nya bisi nyadi kes sakit nyamuk. Dalam kandang seminggu nya udah bisi lima iku kena rampit penyakit nya.
“Tuju pengawa meresi kandang rumah diri ngambika nyaup nyeliah palan endur nyamuk betelu,” ku iya madah ngagai Utusan Borneo.
Iya madahka diri temegah ati ngagai kededua peranak genturung pendiau nya laban ti meri kerejasama ngemujurka pengawa nya seraya nyaga pemeresi kandang rumah diri kena nyeliahka ari penyakit denggi.
Bala JKKK Iban enggau Melayu, ketuai raban bansa, Dewan Bandaraya Kuching Utara (DBKU), Opis Pengerai Negeri Sarawak sama besaup ngemujurka juluk nyaga pemeresi genturung pendiau.
“Pengawa beripai ti ngemeratka pemeresi kandang endur diri empu ke diatur apin lama endang nerima sukung ti manah ari peranak Genturung Pendiau Siol Kandis Iban enggau Siol Kandis Melayu,” ku Alexander.