Pengempu tanah di Lubok Antu dibayar perintah pampas RM1.6j

0

SRI AMAN: Perintah udah mayar duit pampas RM1.6 juta ngagai 122 iku orang ti beempu tanah ba kandang menua Lubok Antu di Dewan Suarah ditu, kemari.

Menteri Pengatur Pemansang enggau Pengeraja Asal Kedua, Datuk Amar Awang Tengah Ali Hasan madah, duit pampas nya dibayar ngagai orang ti ngempu tanah ngambika Projek Ngemanahka Jalai Bukit Tungku/Seremat/Sayat di Lubok Antu ke sepenyauh 18.5 kilometer ulih dipejalaika.

“Orang ti ngempu tanah ke bekaul enggau projek ngemanahka jalai nya ari rumah panjai Bara, Bukit Tungku, Sayat, Soh, Rumah Tan-Seremat enggau Rumah Ringkai-Seremat,” ku iya.

Iya bejaku munyi tu ba pengerami nyuaka chek pampas tanah disempulang enggau pengawa nyuaka pala tanah ungkup Projek Ngambi Pulai Baru Tanah Pulau Seduku Lingga enggau Projek Naik Ngemanahka Jalai Bukit Tungku/Seremat/Sayat Lubok Antu di Dewan Suarah ditu, kemari.

Awang Tengah ke mega Menteri Pemansang Industri Sarawak lalu nyuaka chek bayar duit sagu ati (ex-gratia) ngagai 38 iku peranak ba palan Pengentap Berumah Baru, Agropolitan Genturung Pendiau Baru Pulau Seduku, Lingga.

Ku iya, duit bayar sagu ati ke beungkus RM1.51 juta nya mungkur 45 iti bangunan nyengkaum rumah, rumah padi, masjid, surau, rumah kedai enggau jematan ba endur nya.

Ku iya, perintah mega nyerahka pala tanah ngagai 121 iku peranak ba Sekim Palan Pengentap Berumah Baru, Genturung Pendiau Baru Pulau Seduku, Lingga.

“Pengawa mayar duit pampasan ungkup Projek Ngambi Pulai Tanah Pulau Seduku udah dipejalaika taun seiti nyin tadi nengah ungkus RM4.1 juta,” ku iya.

Bela bisi ngulu pengerami nya Menteri Muda Pengatur Pemansang Pengeraja Asal, Datuk Mohd Naroden Majais, Kaban Parlimen Lubok Antu Datuk William Nyalau Badak, Kaban Kunsil Nengeri (ADUN) Lingga Simoi Peri, Residen Sri Aman Johnathan Lugoh enggau Penguasa Opis Tanah enggau Survei (JTS) Sri Aman Doris Synia.