KUCHING: Beserimbai enggau Hari Krismas ti deka datai tu, Gerempung Dayak Graduet Sarawak Pampang Indu (SDGA WC) udah ngerami Mantar Hari Krismas begulai enggau bala nembiak ari Salvation Army, bala nembiak ke nyulut ari SK Tabuan Jaya, diri sebilik enggau bala kaban SDGA di sebuah hotel, bedau lama tu tadi.
Chairman pengatur pengawa Shella Georgina Beatrice madah, beserimbai enggau Hari Krismas ti nyauka datai tu, seiti ari pemerat gerempung tu, tetap ngingatka bala nembiak ke (kurang benasit) ti nadai enggau orang begulai ngerami hari besai tu.
“Hari Krismas hari ke dikumbai kitai hari mantu tauka meri ngagai sida ke enda benasit manah. Raban tu patut dikemerat laban enti nadai kitai, sapa agi ke ulih mantu sida iya,” ku Shella.
Atur pengawa ‘SDGA Frosty Xmas Get Together Dinner 2014’ diatur enggau tuju negapka kaul entara kaban Dayak Graduet, kelimpah ari begulai enggau diri sebilik sereta bala pangan.
Pengerami nya udah dipenyadi presiden SDGA, Dr Dusit Jaul.
Entara aktiviti ti bisi dipejalaika maya nya baka ‘Carolling Hari Krismas’, pengawa pemerindang baka ngajat sereta karaoke, besilih perais Hari Krismas, pengawa mandangka fesyen, chabut tikit benasit sereta sekeda main bukai.
SDGA WC dibagi ngagai tiga iti unit, iya nya pelajar, pengawa dagang enggau komuniti sereta tanggungpengawa rama.
Sepemanjai taun 2014, SDGA WC udah ngatur pengawa Konferen Pengawa Dagang Indu, ke beratika kaul dagang, Licha pasal Jaku English enggau Pekara bekaul enggau Wang ba sekeda sekula ke dipilih, meransang bala nembiak ba pengawa belajar sereta ngiri penemu ngagai nembiak sentang pemaik nemu naruh duit.
Kelimpah ari nya, atur pengawa bukai ke udah diatur pampang nya mega baka nemuai ngagai Biro Indu Sarawak sereta ngaga kaul kereja enggau opis-opis menteri, industri sereta orang ke ngatika diri ti ulih mantu pampang tu ngulihka bantu belanja dikena ngatur aktiviti gerempung nya.
SDGA WC meri besai terima ksih ngaga bala orang ti udah gerah jari meri belanja baka orang dagag ke tebilang, Tan Sri Leonard Linggi Jugah, Giri, Dato Grunsin Ayom (ari opis Kaunsil Lada Malaysia) enggau semua ke sama udah bela mantu pemujur atur pengawa tu.
“Ngarapka taun ti deka datai tu ila, taun 2015 bisi berekat sereta ulih begempung semua graduet bansa Dayak, diri sebilik enggau bala pangan bukai nyentuk ke jemah ila. Belalauka leka jaku Henry Ford, ‘Coming together is a beginning, keeping together is progress, working together is success’,” ku Shella.