KANOWIT: Peranak rumah panjai ba pelilih tu ditangkan ngambi numbuhka Komiti Rukun Tetangga (KRT) dikena neritka agi kaul enggau pangan diri.
Sekretari Politik Kepala Menteri Maurice Giri madah, KRT mega ulih bekerejasama enggau Komiti Pemansang enggau Pengelikun Genturung Pendiau (JKKK) merambu ngatur program tauka pengerami ba rumah panjai.
“KRT ukai semina nyadi pelasar kitai ngemanahka kaul ke enggau diri tang mega mai kitai bela ngulu pengawa ti manah ke pengerai enggau penguntung ngagai diri empu.
“Penumbuh KRT dikena kitai merambu macham bengkah pengawa enggau pengerami,” pia ku iya madah.
Iya mantaika jaku nya maya bejadika KRT Simpang Geremai ba Rumah Iyang, Kilometer 8, Jalai Kanaowit/Durin ditu, hari Enam tu tadi.
Pengerami nya bela digulu Pemesai Opis Penyerakup Sitak Sibu Susan Bennet, Pemancha Spencer Kudang, Pengulu Lawrence Melaka enggau bala temuai ke bukai.
Maurice madah KRT mega ulih ngintu pengelikun ba rumah panjai nengah pengawa numbuhka Skim Rondaan Sukarela (SRS).
“Kitai bela nemu diatu SRS engkeman ditumbuhka nyengkaum ba tetiap buah rumah panjai.
“SRS mega ulih nyaup raban pengintu pengelikun ke bukai lebih agi bekaul enggau pengelikun ba rumah panjai,” ku iya nerangka.
Ku iya, KRT enggau JKKK patut begempung enggau pangan diri berundingka chara bakani ngatur pemansang ba rumah panjai.
Dulu ari tu, Susan ba jaku pengelalu iya muji pengawa Tuai Rumah Iyang ti numbuhka KRT sida.
Iya madah, pekara nya mandangka rayat ba rumah panjai nya nembu bagi guna KRT ba menua pesisir.