Sab-Pelilih Mit Sebauh udah balat endar mansang dalam timpuh 20 taun ti udah
SEBAUH: Sab-Pelilih Mit Sebauh deka diangkat nyadi Pelilih Mit taun baru berindik ari pengerembai pemansang ke balat endar nyadi ba sab-pelilih mit nya kenyau ari 20 taun ke udah, pia ku Menteri Muda Perengkaguna Mensia Mayuh (Lekterik enggau Telekomunikasyen), Datuk Dr Stephen Rundi Utom.
Ku iya, Sebauh udah balat endar mansang ba sektor ladang sawit sereta nyadi chunto ke pemadu manah ba pengawa ngemansangka tanah Adat Bansa Asal (NCR) di nengeri tu.
“Nengah pemansang ke balat endar nyadi di Sebauh, nya ulih ngenyampatka agi atur transformasyen ba mayuh bengkah bidang nyengkaum aktiviti ba tikas ke baruh agi,” pia ku lebuh ke bejaku ba pengerami Mantar Krismas 2014 ke diatur ba Dewan Komuniti Sebauh, apin lama ke udah.
Ku Rundi, Sebauh mega nyadi palan endur ngetu ngagai peranak menua nya di deka mansang ke pasar Bintulu, seraya arapka peranak ba pasar Sebauh sereta ke besemak nguna peluang nyungkak ekonomi sida ke lebih agi ba bidang betanam betupi.
“Aktiviti ekonomi ulih dipejalaika seagi rayat deka ngemansangka tanah sida nengah chara ngemayuhka utai tanam baka nanam sayur, buah, sawit koko enggau utai bukai ti tau meri penguntung,” ku iya.
Ku iya, nengah servis feri di Sebauh ke dikena meraka Sungai Kemena, ulih nyaup ngemuntangka pejalai peranak ari Pandan, Tubau, Binyo enggau Ulu Jelalong sereta sekeda endur ba kandang menua nya ke pasar Bintulu.
“Nya alai aku pechaya sab-Pelilih Mit Sebauh endang diangkat nyadi Pelilih Mit ba taun 2015 tu ila,” ku iya.
Pekara ke beguna amat diatu iya nya, perintah deka nentuka pelilih mit Sebauh bisi bank, stesyen Pengerara Api enggau Penyah Penusah (Bomba), dewan Komuniti ke besai agi, Balai Polis enggau perengkaguna bukai ungkup rayat ditu.
Beserimbai enggau nya, DD Pelita Sebungan Plantation Sdn Bhd lalu nyuaka dividen RM1.5 miliun ngagai penerima ke masuk projek sama ngemansangka tanah NCR di kandang menua Sebungan.
Rundi berasai gaga sereta temegah endar ati laban rayat di Sebauh ke lebih agi ba kandang menua Sebungan ke masuk ba projek begempung ngemansangka tanah NCR nya udah bulih penguntung.
“Aku arapka mayuh agi rayat di Sebauh ke bisi tanah NCR masuk ba projek begempung ngemansangka tanah nya ngambika sida bulih penguntung ari tanah sida,” ku Rundi.
Bela bisi ngulu pengerami nya SAO Sebauh David Kala, Direktor Double Dynasty Plantation Sdn Bhd, Tan Sri Yee Ming Seng enggau Chairman Komiti Pemansang Tanah NCR (Sebungan), Marepat Sekeran.