KUCHING: Taja pan Sarawak enda mayuh bulih penerebai bilun terus ari menua luar kitu enti dibanding enggau Sabah, penyampau penatai temuai mayuh ari Sabah.
Menteri Muda Dagang Temuai Datuk Gramong Juna madah, ari penyampau temuai, Sarawak nerima mayuh ari Sabah taja pan nadai mayuh penerebai bilun terus baka Cathay Pacific, Dragon Air enggau sekeda bilun antarabansa bukai kitu.
“Taja pan bisi pengurang penerebai bilun ari menua luar ke Sarawak, industri dagang temuai kitai numbas pemanah. Sarawak mujur nyapai tagit pemayuh temuai kitu, baka bulan Oktober tu tadi, bisi nambah 24 persin dibanding enggau timpuh ke sama taun nyin tadi,” ku Gramong madah ba aum media pengudah bejadika ‘Engagement Session with Industry Players in-conjunction with Malaysia Year of Festival (MyFEST) 2015 di Hotel Pullman ditu, ensana.
Gramong ti mega Menteri Pemansang Tanah madah tagit industri dagang temuai taun 2015 tu ila, dikearapka ulih nyapai 4.6 juta penyampau temuai ke Sarawak.
“Taun baru tu ila, tagit kitai, 4.8 juta, lalu aku pechaya kitai ulih nyapai tagit nya. Diatu pan, bisi udah nambah taja pan pengurang penerebai bilun ari menua luar kitu,” ku iya.
Kena mansi pengurang nya ku Gramong, Perintah Menua nengah Opis Menteri Dagang Temuai (MOT) ari suba beratika deka nyatar penerebai ari sekeda menua baka China.
“Kami udah berandau enggau sekeda media sereta ejen dagang temuai enti sida iya ulih ngatur penerebai suwa ari sekeda bengkah menua China tauka Hongkong terus ke Kuching, perintah deka meri insentif ngagai penerebai suwa tu,” ku iya lalu nambah timbal ari China nya dipeda manah.
Entara insentif ti bisi disediaka perintah, iya nya palan endur engkah bilun enda bebayar, promosyen makit, subsidi ngena ‘aerobridge’ nyengkaum kereban pengangkut enda bebayar ari padang bilun ngagai hotel.
Promosyen tu mega nyengkaum sekeda menua Eropah.