KUCHING: Sarawak deka ngembuan sebuah palan belelak anak mit ke deka digaga ngena konsep gadung sereta tebuka lebuh ‘Vh Green Nature Park’ deka dibuka bulan Februari taun baru tu ila.
Direktor VH Green Nature Park Sdn Bhd Victoria Hwang madah palan belelak ke ngembuan pemesai urung 4.5 ikar di Batu 4, Jalai Matang ditu, deka nyendiaka palan ke nembiak mit nyengkaum orang besai tuai ngaul rampa menua ke nyadi pesaka menua tu.
Iya madah, mensia mayuh ke datai ngagai palan nya bepeluang meda enggau semak agi atur ngaga sekeda barang ke udah dikena sereta tau dikena baru ti digaga ari sekeda bengkah utai bukai, utai tanam gadung, nyengkaum mayuh macham aktiviti belelak ba palan ke beresi, likun sereta diintu enggau manah.
Kelimpah ari nya iya madah,ba palan nya mega apai indai ulih ngereja aktiviti luar begulai enggau anak sereta bala pangan sida.
“Nembiak patut bisi palan endur bemain sereta belajar ke ulih meri peneleba ngagai sida lebuh bemain tauka ngaga penau nitihka pengelandik sida iya empu.
“Belajar sereta bemain bejalai setipak enggau pemansang nembiak mit,” ku iya madah ngagai media pengudah betemu enggau Menteri Pengelantang Pendiau, Orang Indu enggau pemansang diri Sebilik Datuk Fatimah Abdullah, di opis menteri nya kemari, ke sama digulu ulih raban ari VH Green Nature Park Sdn Bhd.
Nitih ku Hwang, palan nya dibagi ngagai mayuh bagi, iya nya blok opis besai palan nya, palan endur anak mit bemain, ‘corn conner’, kebun buah, palan endur nupi jelu, palan organik, rumah kebun enggau kebun herba.
VH Green Nature Park nyadi projek kedua kompeni nya, udah muka ‘Kidz Paradise’ di ringkat dua (2) ba palan bebeli barang The Spring ditu.
Fatimah lebuh nimbal madah, pengawa muka palan bansa nya setipak enggau peneka opis menteri nya muka mayuh agi palan belelak anak mit, ukai semina dalam rumah tang ba endur ke tebuka (outdoor).
“Opis Menteri kami sigi seruran ngemerat palan belelak anak mit laban baka ke ditemu kitai, pengawa baka tu ulih matih anak mit ke ngembuan ulah ke manah. Diatu udah mayuh palan alai anak it belelak digaga dalam rumah, baka ba palan bebeli barang ti nerima timbal ke chukup manah.
“Utai kedeka kitai diatu iya nya, bisi palan belelak di luar rumah, ba endur ke tebuka. Palan ngembuan mayuh pemanah nyengkaum ari semua sukut sereta ngemeratka rampa menua, ukai nya ke anak mit aja, tang mungkur semua tikas umur, kelimpah ari palan tu muntang digagai,” ku iya.
Kelimpah ari nya mega, Fatimah madah palan tu tau nyadi palan ke nyendiaka peneleba ngagai bala nembiak ke diau di nengeri ngambika ngelala menua sida empu.
“Tu peneleba ke chukup manah sereta seiti pelajar ngagai anak mit tauka rebak baru ke enda ngelala rampa menua sida empu.
“Lebuh sida iya dibai ngelala utai ke nyadi ngelingi sida iya, nya baru sida iya nemu lalu nyadi orang ke siru ngagai rampa menua ke endur sida iya diau,” ku Fatimah.
Kelipmpah ari nya mega, iya ngarapka palan belelak nya mega deka dibuka ba endur bukai, baka di Sibu, Miri enggau Bintulu jemah ila.