SIBURAN: Kandang pendiau Siburan nyengkaum Tapah enggau Beratok enda suntuk ai beresi tiga taun ari diatu.
Kaban Kunsil Nengeri (Adun) Bengoh Datuk Dr Jerip Susil madah, fasa 1 projek nyambung paip ai ari Kuching nyentuk ke Serian ti bekenaka belanja RM50 juta udah dikemendar lalu pengawa disadang berengkah bulan April 2015.
“Tu sebengkah projek timpuh panjai kena mutar penanggul suntuk bekal ai ti udah 10 taun diasai peranak di Siburan, Tapah enggau Beratok.
“Paip deka disambung terus ari Kuching Water Board nyentuk ke Serian ke alai kitai mega deka nganti paip ti udah lama enggau paip ke baru.
‘Projek disadang tembu dalam timpuh 18 bulan lalu enggau nya peranak ke diau di ketetiga kandang pendiau nya deka nerima bekal ai beresi ke meruan,” ku iya.
Iya mansutka jaku tu ba sebengkah aum pengarang berita pengudah ngelanchar Program Jiwa Murni ke mega nyadi pengawa ngagihka 200 igi tangki ai ngagai peranak Siburan di Balai Mensia Mayuh Siburan ditu, kemari.
Ngenang senetang program nya, Jerip ke mega Menteri Muda Pengerai Mensia Mayuh madah tangki ti tau ngundan 200 liter ai nya dikearap ulih mantu ngurangka pemerinsa suntuk bekal ai ke ditapi sida di kandang pendiau Siburan, Tapah enggau Beratok.
Ku iya, penyampau 494 pinta bisi diterima lalu 80 igi tangki udah diagih ba bulan September tu tadi kelimpah 200 sehari tu ke alai laluh deka diagih ba renggat ke dua program nya ila.
Iya mega madah dua bengkah projek ngaga palan pemeresi ai besemak Siburan udah dikemendar ba taun 2015 ngambika ulih mantu mutar penanggul.
“Kesatu, kitai deka ngaga seiti palan pemeresi ai di Sungai Serin ke tau ngeluarka 2 juta liter ai sehari (MLD) lalu kedua kitai deka ngaga seiti agi palan di Tapah besemak enggau palan pemeresi ai ke lama lalu disadang ulih ngeluarka 5 MLD,” ku iya.
Dulu agi ari nya, ba jaku ngelanchar program, Jerip madah, kandang pendiau Siburan napi penusah bekal ai berindik ari penyampau mensia ke nguan kandang menua nya majak nambah.
Ku iya, urung taun 60 nyentuk 70 menya, semina beribu aja orang ke nguan Siburan sereta kandang endur besemak tang diatu udah nambah ngelui ari 10,000.
Ba pengerami ke sama, Injinir Opis Kereja Raya Lau Chong Choon madah bisi 9,433 ruang bilik bekenaka meter ai di Siburan enti dibandingka enggau semina 7,000 aja empat taun ke udah.
Ku iya, Palan Pemeresi Ai Tapah (lama) semina ulih ngeluarka 12,182 MLD enti dibandingka enggau pinta 17,160 MLD.
“Ketegal nya Siburan balat napi penusah suntuk bekal ai lalu ketetiga projek tadi disadang ulih nyaup mutarka penanggul,” ku iya lebuh ke meri licha senentang projek kemari.
Bela bisi ngulu atur pengawa nya, Temenggung Austin Dimin enggau Kapitan Irene Chia Ai Ling.