Kelimpah ari nya pemayuh rikod penyakit nya di pelilih Betong, Mukah mega nambah ari ke udah
Dikarang Chris Bishop //
SIBURAN: Pelilih Sibu meruan ngerikod kes denggi ti pemadu mayuh enti dibandingka enggau pelilih bukai, ku Menteri Muda Pengerai Mensia Mayuh Datuk Dr Jerip Susil.
Iya nambah Pelilih Mukah enggau Betong ba penuduk lumur dua enggau tiga nangkanka Sibu ba taun 2014 tu.
“Taja pan penyampau kes denggi ke diripot di Sarawak ba taun 2014 bisi nambah ari taun ke udah, kitai benasit ketegal naka ke diatu kes nya nadai nabanka sebarang nyawa.
“Penyampau kes diripot di Pelilih Kuching aja bisi nambah ari taun ke udah,” ku iya.
Iya mansutka jaku tu maya nyaut tanya pemberita ba sebengkah aum pengarang berita pengudah ngelanchar Program Jiwa Murni di Balai Mensia Mayuh Siburan ditu, kemari.
Iya ke mega Kaban Kunsil Nengeri (ADUN) sitak Bengoh madah, tiap kali maya pengujan, kes denggi endang ditemu nambah lalu pelilih Sibu entara bagi menua ke mayuh ngerikodka kes penyakit nya.
Ku iya, parit di Jalai Oya enggau kandang endur bukai di Sibu suah alit lalu nya entara kebuah nyamuk aedes mudah betelu.
“Berindik ari nya, kitai minta saup Opis Kaunsil Kandang Sibu (SMC) beratika gaya parit enggau silik. Parit patut diperesi ngambika tau nyeliah palan nyamuk edes betelu,” ku iya.