SIMUNJAN: Pengawa nyekat ti dipejalaika Koperasi Kampung Tuba Simunjan Berhad (KKTSB) kena nagang kompeni batang bekereja di Kampung Tuba bepun ari 2 Disember 2014 tu tadi udah diketuka enggau aman kena Hari Minggu, 14 Disember 2014 tu tadi pengudah kedua-dua piak setuju ngaga sempekat baru.
Ketegal ti enda ngemeranka pekara ti udah disemayaka ba sempekat enggau KKTSB, dia kompeni batang nya ngetu gawa pengelama dua minggu laban ditagang kaban koperasi nya.
Dulu ari nya, KKTSB bisi meri tiga bengkah notis ngagai kompeni nya sida nembuka kereja ti udah disemaya nitih ke sempekat baka ngaga jalai nuju rumah panjai, ngetu berimba ungkup sida ke enda enggau nuntut menua Tuba ari kot sereta pekara bukai ti ditagang KKTSB.
Pengudah berandau beberapa kali enggau kompeni begulai enggau Penghulu kandang menua Sebuyau, Penghulu Ali Anak Danjie, SAO Sebuyau, Ajis Ahmad, Ketuai balai polis Sebuyau, Pemesai Polis Simunjan enggau Pemesai Polis ari Kuching sereta enggau luyar ari kedua-dua piak, dia penyarut nya diputar nengah pengawa besainka sempekat baru.
“Atur ke terit bepelasdarka undang-undang deka dipejalaika koperasi ba kompeni nya enti sema bisi tetemuka pengawa salah nyadi tauka kompeni enda ngemanaka sempekat ti baru” ku Joshua Karin, chairman KKTSB.
Kena 14 September 2010, perintah menua Sarawak setuju ngeluarka Kampung Tuba ari kena bungkor Taman Negara lebuh perintah ngaga sempadan baru disempulang pengawa gazette kena 10 Julai 2010 sereta perintah ari kot kena 24 Januari 2011.
Rayat ke mai pekara tu ngagai kot lalu numbuhka KKTSB kena ngemansangka tanah NCR sereta pemakai menu sida dia enggau lebih strategik. Langgur pemansang koperasi nya udah dibantai sereta dipejuraika maya randau kena 20 November 2013 ti diatur Tamoi Janggu, seiku pengajar ba sebengkah palan pelajar tinggi di Sarawak ditu ti mega seiku ari ketuai KKTSB.
Joshua Karin Chali enggau Tamoi Janggu meri besai terima kasih ngagai Penghulu, SAO, Pemesai ari opis polis sitak Sebuyau, Simunjan enggau Kuching, luyar enggau Opis kampung laban udah nulung ngatur penyarut ke nuntung Kampung Tuba.
Kampung Tuba diuan urung 800 iku peranak menua bansa Iban lalu menua tu semina ulih dilawa kira enam jam ari Kuching ngena kereta 4WD aja.
Tuba disikap sebuah sekula primari, ai paip, enerji solar enggau utai bukai. Nyauka semua rayat ditu ngembuan chara idup bumai bekebun baka nanam sawit, padi enggau getah.