KUCHING: Insentif Pemansut Getah (RPI) deka dikemata ari baruh Opis Betanam Betupi Nengeri, enti udah dipenyadi dalam bulan Januari 2015.
Menteri Kebun Dandang Besai enggau Komoditi, Datuk Amar Douglas Uggah Embas madahka perintah besai udah ngemendarka RPI laban ulih dikena mantu orang ke bekebun mit getah, taja pan rega getah majak nurun.
Pengawa numbuhka RPI nya setipak enggau Bajet 2015, ke alai perintah udah ngungkupka belanja RM100 miliun ungkup RPI ke lebih agi ngagai pekebun mit getah di serata nengeri tu.
“RPI deka diaktifka lebuh tikas rega Setindit Getah Malaysia (SMD) 20 manggai ba RM4.60 sekilo tauka baruh ari nya. Lebuh pekara tu nyadi, perintah ngemansutka sabsidi urung RM0.30 sekilo ngagai pekebun mit dikena ngelempungka tating sida ketegal rega getah ti nurun,” ku iya lebuh ti nemuai ngagai Kepala Menteri, Datuk Patinggi Tan Sri Adenan Satem ba opis iya di Kompleks Kunsil Nengeri (DUN) Complex kena Hari Dua tu tadi.
Berebak engagu nya, raban ti betuaika Uggah nya lalu meri penerang ngagai Adenan sentang pengawa numbuhka RPI di nengeri tu.
Kelimpah ari nya, iya mega bisi ngelansa sentang sekeda program ti udah dipenyadika opis menteri iya dikena mantu pekebun mit getah di serata nengeri, baka pengawa sekali meri geran RM500 ngagai pekebun mit getah taun tu, sabsidi nanam baru getah sereta sabsidi nanam getah baru.
“Nyentuk ke diatu, Opis Betanam Betupi udah nge rikut urung 78,000 iku pekebun mit getah di serata Sarawak nyengkaum ke apin direjista ba opis nya.
“Pengawa ngerejista nya deka majak dipejalaika opis nya nyentuk ujung taun tu ngambi ngemudahka pengawa meri bantu.Orang ti bekebun mit getah tau enda ibuh nganti kad dikeluarka, tang tau ngena risit ngambi ngemudahka sida diterima sereta direjista nyentuk ke ujung taun tu,” ku Uggah.
Beserimbai enggau nya, Adenan mantaika pengaga ati iya laban bantu ti disediaka nya ulih dikena mantu pekebun mit getah.
Iya mega ngelalau ngambika pom dikena nuntut RPI nya enda kelalu mar diisi, ngambika bantu ti sediaka nya ulih ngelempungka tating pekebun mit getah tekala nya, laban nya meh chara perintah nyaup mutarka penanggul nya.
Adenan mega ngelalau Uggah nyendiaka bantu ngagai sida ti begunaka bantu nya.