Pulaika penguntung BN enti penyerekang penemu nya ulih diputar nengah chara ke manah
PAKAN: Manah ke Barisan Nasional (BN) enti sema SUPP, UPP, SPDP enggau Teras ulih ngiga chara ke manah mutarka penanggul ti nyadi entara sida sebedau Pengawa Bepilih Kunsil Nengeri diatur dalam taun 2016.
Ku Chairman Penyanding Penemu 1Malaysia Sarawak, Datuk Joseph Salang, gaya politik ke nyadi be parti – parti nya ke diatu tau ngelemika pengering enggau penyerakup BN.
“Semua nya tau nutup peluang BN menang besai ba pengawa bepilih ila,” pia ku iya lebuh ke bejaku ba pengerami begulai enggau rayat di Rh Melaka Sungai Mon, Nunggang empai lama ke udah.
Dulu ari nya, iya udah bejadi jematan besi ke beungkus RM150,000 besemak enggau raumah panjai nya.
Salang Mandal presiden Parti Rakyat Sarawak (PRS) ke mega MP Julau ngenang penyaru pasal pekara nya udah nyadi ba peranak menua pesisir berindik ari laya entara SPDP enggau TERAS.
“SPDP udah direjista nyadi komponen BN nengeri tang TERAS bedau diterima nyadi kaban BN taja pan ketuai parti madahka TERAS nya parti BN.
“Diatu rayat saru runding, parti ni ke patut disukung lalu parti ni ke patut ngetanka sitak Pakan taja pan penyandang sitak nya ex- presiden SPDP, Tan Sri William Mawan ke nyadi presiden TERAS diatu,” ku iya.
Ku Salang, enti nitihka konsensus BN, semua keempat- empat parti komponen BN enda tau enda nerima penama TERAS enggau UPP, nya baru sida ulih diaku nyadi sebagi ari BN.
“Enti sema bisi seiti ari empat iti parti nya nyakal, nya dikira enda ulih diterima,” ku iya.
Ku iya baru, taja pan bala ketuai enggau penyukung sida madahka diri komponen BN, tang sida ke bendar tau disema baka ‘temuai’ dalam rumah BN.
“Enti nitihka pematut,Pakan endang diempu SPDP.
“SPDP bisi kuasa ngetanka penuduk nya ke BN. Aku ukai deka nyengki Mawan, tang nya meh pengamat iya,” ku Salang.
Ku Salang, sesiku orang politik nya beguna amat, taja pia orang politik ti udah suntuk penemu gawa ke rayat, patut ningkilka diri.
Dulu ari nya, iya udah nemuai ngagai Rh Ranggau di Ulu Dayu ke alai iya nerima 32 iti pom peminta nyadi kaban baru PRS.