BASA: Morshidi disempulang Abdul Wahap (kiba) meresa baris raban DBKU sebedau bejadika Hari Integriti enggau Inovasi DBKU 2014, kemari.
Pengawa ti nyaruka runding rayat pasal GST ukai ulah ke manah
SRI AMAN: Menteri Dagang Dalam Menua, Koperasi enggau Pekara Bebeli Barang Dato’ Sri Hasan Bin Malek enda lantang ati enggau ulah sekeda orang ti sengapa nyaruka runding mensia mayuh ba senentang Chukai enggau Servis (GST) nengah poster sereta resit.
Nentuka pengawa nya enda ngerembai, Hasan madah opis menteri udah bejalaika sekeda atur ngambika tau ngetuka ulah nya.
“Kami udah neritka adat ba sekeda orang ti udah dulu ngena sistem GST ti semina deka diterit kena 1 April 2015,” ku iya.
Iya mansutka jaku nya ba seiti aum pengarang berita pengudah bejadi Sekim Ngintu Rega Barang Musin Hari Krismas 2014 ditu, kemari.
Kelimpah ari nya, iya mega madahka opis menteri bisi berandau enggau Opis Betanam Betupi ngambika tau teulihka bekal manuk kuluk ungkup musin pengerami taun tu.
Taja pia, iya madah bekal manuk enggau telu maya ke diatu chukup dikena napi minta maya Hari Krismas tu.
Ngenang kaul ke sama, Hasan minta orang dagang ngurangka rega barang sida setipak enggau rega minyak ti udah nurun.
“Baka ke ditemu kitai, rega minyak ba markit dunya enda tentu, kekadang niki enggau nurun.
“Enti rega minyak nurun, raban orang dagang patut ngurangka rega barang ke dijual sida,” ku iya seraya ngansak mensia mayuh ngenataika pinta nya ngagai orang dagang.
Nitihka penerang ari Hasan, Sekim Ngintu Rega barang Musin Hari Krismas 2014 deka berengkah ari 23 nyentuk ke 27 Disember tu.
Timpuh kitai neritka sekim nya ngelama lima hari, iya nya dua hari sebedau Hari Krismas sereta dua hari pengudah Krismas, tandu iya.
Bela datai Menteri Muda Pengatur Pengeraja Asal Datuk Mohd Naroden Majais, Kaban Kunsil Nengeri (ADUN) Lingga, Simoi Peri enggau bala bukai.