Setem lama ukai semina majak berega tang mega ulih nyeritaka sejarah sesebuah menua ti ngemansutka setem nya
KUCHING: Nyerumba pemansang teknologi dunya IT ke diatu, tebal agi pengawa bekirum surat ke bisi nguna setem majak kurang popular ke lebih agi ba nembiak rebak baru, semadi meh ‘surat rasmi’ ti enda tau enda dikirum ngagai seiku ke dianjung ari opis-opis perintah enggau sekeda opis ke bukai.
Chara ke muntang agi sereta suah agi dikena ngenataika pemadah diatu iya nya, ngena kereban internet tauka perengka penyambung bukai, ti disediaka kompeni telekomunikasyen. Berindik ari nya, setem pan majak kurang diguna ti ngujungka pemansang industri setem diatu majak kurang ngerembai enti dibanding enggau ke sebedau tu.
Taja pia, ba Razana Ramly ke beasal ari Kota Bharu Kelantan, ti udah ngemeranka pengawa ngumpul sereta bejualka setem lama nengah chara ‘online’ sechara mendam, madahka pengerindu ngumpul setem nya udah bisi ba iya kenyau beumur tiga taun, laban niang apai iya endang sigi rinduka pengawa nya.
Niang apai iya Ramly Yaacop, seiku orang ke tebilang dalam dunya setem sereta diberi gelar ‘Raja Setem Malaysia’ ketegal ngembuan mayuh macham bansa sereta nyual setem lama, nadai kala enda enggau lebuh maya bisi pemandang setem diatur, sekalika ba tikas nasional tauka entarabansa.
Niang Ramly udah ngemeranka pengawa ngumpul setem nya lebih 50 taun, kenyau ari iya beumur tujuh taun. Razana ti nampung pengawa ti udah dipunka niang apai iya madah, ukai mudah deka ngumpul tauka ngiga semua setem lama nya. Iya ngulihka setem ari bala pangan ke di menua tasik, meli ari penyual setem di menua tasik nengah chara ‘online’ sereta besilih setem nengah Kelab Filateli Malaysia.
“Aku ngulihka setem nya ari bala pangan di menua tasik, meli ari penyual setem di menua tasik sechara ‘online’ sereta besilih setem nengah Kelab Philately Malaysia,” ku iya lebuh ti dikerandau pemberita apin lama ke udah. Iya mega madah, rega setem ke dibeli tauka dijual nya bepanggai ba penuai umur setem, reti nya tuai agi umur setem, majak mar meh rega setem nya enti dijual baru. Ambika Chunto, baka setem lama ke dikumbai ‘setem Mint Malaya’, setem tu bisi penyelai mimit enti dibanding enggau setem bukai, laban keretas ke dikena ngaga setem nya bisi menyeling. Kelia rega setem tu semina bebeapa sen aja, tang diatu dijual aku enggau rega RM125.00 seset, tauka dua 12 iti setem.
Lebuh ke ditanya pemberita sentang penguntung ari pengawa ngumpul sereta nyual setem, Razana madah, taja pan pengawa tu baka ke mit dipeda tauka nadai reti ba sekeda orang ti nadai pengerindu ngumpulka setem, tang ba aku tu sebengkah ari chara kitai nyaup ngemansangka industri setem menua ngambika guna setem relevan belama, nemu pemesai reti guna enggau peninggi rega utai lama,nambah sereta bekunsi penemu enggau orang ti sama rindu ngumpul setem, sebengkah ari chara beranakka puku sereta ulih nambahka penatai pemisi.
“Ba runding aku tu sebengkah ari chara kitai nyaup ngemansangka industri setem menua ngambika guna setem relevan belama, nemu pemesai reti guna enggau peninggi rega utai lama,nambah sereta bekunsi penemu enggau orang ti sama rindu ngumpul setem, sebengkah ari chara beranakka puku sereta ulih nambahka penatai pemisi,” ku iya.
Setem lama mega ulih nyeritaka sejarah sesebengkah menua laban sesebengkah pekara ke udah nyadi suah dichelak nyadi setem ti tau pulaika pengingat kitai belama, ku iya. Ku iya baru, taja pan penguntung ari asil bejual setem nengah chara tu enda tetap, tang nya meh adat bedagang, tau disema baka ai bisi maya pasang lalu bisi mega maya surut. Razana nampung sereta ngemeranka pengawa ti ditinggalka niang apai iya pengawa nya ari rumah. Dalam rumah iya enda bisi palan ke meruan endur naruh setem.
Ngelama tu, sesapa ke deka meli setem lama nya suah agi datai terus ngagai rumah iya, lalu ngagai orang ke ari menua jauh tauka menua tasik, sida suah meli tauka minta galauka setem ti dikedeka nengah chara ‘online’.
Kelimpah ari nya, sebengkah ari stratergi dagang iya nyual setem iya nengah chara masuk ba pengawa mandangka setem sekalika ba tikas nasional enggau entarabansa. Nambahka nya, Razana mega bisi ngatur pemandang setem ba sekeda sekula primari enggau sekondari, dikena nerenak pengerindu seraya besaumka penemu pasal setem lama menua tu enggau ari menua tasik. “Nya sebengkah ari chara nerenak pengerindu seraya besaumka penemu pasal setem lama menua tu sereta ari menua tasik enggau bala nembiak, ngambika sida nemu pemesai reti guna sereta peninggi rega setem lama ke majak enda dikeibuhka,” ku iya.
Razana arapka majak mayuh agi orang ngembuan pengerindu ngumpul setem lama tauka baru, ngambika ulih nyaup ngemansangka industri setem di menua tu, kelimpah ari talukka utai lama ti ukai semina ulih dipeda belama, tang mega tau nyadika sebengkah ari chara nambahka penatai pemisi diri. Berebak enggau nya, iya mega madahka diri baru udah enggau ba pengawa pemandang Malaysia 2014 World Youth Stamp Exhibition enggau 29th Asian International Stamp Exihibition ke diatur berengkah ari 1-6 Disember tu tadi.
Nangkanka nya iya meda masuk ba Singapore 2015 World Stamp Exhibion ke deka diatur kena 14-19 Ogos 2015, di Sand Expo and Covention Center, Marina Bay Hotel Singapura. Sesapa ke bisi ati deka meli mayuh macham bansa setem lama, tauka bekunsika peneleba sereta pengerindu ke bekaul enggau setem, tau betelefon ngagai iya nengah lumur 018-2328020.