Anang nguna perengka IT alai betenahka orang bukai: Razi

0

DEBAK: Mensia mayuh patut nguna perengka guna teknologi pemadah (IT) enggau manah, ukai dikena alai betenahka orang bukai sereta diguna enggau chara ke salah.

Kaban Kunsil Nengeri (ADUN) Saribas, Mohamad Razi Sitam madah, tetiap iku mensia ke nguna perengka guna tu patut pintar berunding.

Ku iya, perengka nya patut diguna ngena jalai ke betul dikena ngulihka sebarang informesyen ke diguna kelebih agi pekara ke bekaul enggau pemansang ke nyadi kemaya hari tu.

“Mayuh bida iya kitai nguna perengka IT tu. Tang taja pia, semua nya bepanggai ba pemintar seseiku mensia lebuh ti begunaka IT ngambika ulih meri bekau positif.

“Ke maya hari tu, dunya IT sebengkah pekara ke chukup beguna laban mayuh pengawa  nyengkaum pengawa rasmi bepanggai ba perengka guna nya.

Razi mansutka jaku nya beserimbai enggau pengerami bejadi Pusat Internet 1 Malaysia (PI1M) di Kampung Bungey, ditu, kemari.

Ba pengerami nya, Razi mega madah, sida mega patut berundingka pekara positif enggau negatif ari IT sebedau mansutka sebarang pekara.

“Mensia mayuh kelebih agi di menua pesisir dilalau ngambi peluang nguna perengka guna jalur lebar ke bisi disediaka ba Pusat Internet 1Malaysia (PI1M).

“Perintah ngungkupka belanja ke besai dikena nyendiaka PI1M nyentuk ngagai menua pesisir ngambika ulih mantu rayat ngelala pasal IT,” ku iya.

Ku iya madah, semua berita dikumbai baru magang enti dipansutka dalam timpuh 24 jam, tang berindik ari pemansang teknologi kemaya hari tu, berita nya dipeda jauh tinggal sereta nadai baru agi.

“Enda semua pekara ke bisi ayan dalam ruai internet nya betul sereta ngembuan runding ke manah laban bisi mega ulah provokasyen nyengkaum jaku petenah kelebih agi pekara ke digaga piak enda beradat dikena nyapai juluk politik sida.

Nya alai, rayat di pinta nguna media rasmi perintah iya nya dikena ngulihka sebarang penerang ke silik sereta nyentuk,” ku iya nandu.

Kelimpah ari nya ku iya, raban Bumiputera kelebih agi sida ke diau di kandang mengeri patut lebih ransing besemekih enggau raban bukai ngeradang awak dalam ngelakuka pengawa dagang sida nengah internet.

“Semua pupu raban bansa patut ngubah runding enggau pikir sida, badu bedagang nitihka chara lama.

“Guna internet enggau manah ngambi ulih ngenataika penguntung sereta ulih dikena ngelakuka dagang kita,” ku iya.

Nangkan ke nya, Razi mega ngarapka piak perintah Barisan Nasional (BN) nyendiaka lebih mayuh perengka guna dikena mantu rayat di menua pesisir.