KOTA SENTOSA: Raban nembiak ‘Y’ ti dikearap nyadi ketuai sereta ngembing menua jemah ila ti patut ngembuan peminta enggau pemerani nentuka kuing ngenegapka menua.
Sapit Ketuai Direktor (Penerangan Strategik) Opis Pemadah Malaysia Mohd Sukari Abdul Hamid madah, diatu bisi seraban orang nguji deka peneka ati ngena raban nembiak ‘Y’ nya.
“Bisi mega sekeda raban nya nguji ngirit nembiak ‘Y’ ngambika sama masuk enggau sida sereta nyadika kereban dikena ngemujurka juluk ati sida.
“Ngagai sida ti kurang penegap runding tentu sida jampat kena achuk sereta pechayaka jaku tuduh enggau petenah ti ngujungka raban nembiak berani besakalka undang-undang menua,” ku iya.
Iya madahka pekara nya lebuh bejaku ba pengerami bejadika Program Bicara Siswa Semangat Patriotisme ‘Apa Kata Gen Y?’ ba Dewan Jubli Universiti Teknologi Mara (UiTM) ditu, apin lama ke udah.
Berindik ari pekara nya, iya ngelalau raban nembiak ‘Y’ seruran tegap runding sereta bepegai ba jalai pengarap awakka ulih nyeliahka diri ari ulah ti enda manah.
“Nyadi meh diri kita empu, anang mudah kena keruga enggau pekara ti mudah ngerusak pengidup diri enggau menua jemah ila.
“Kita semua bisi tanggungpengawa nentuk kuing menua laban maju tauka surut menua tu endang bepanggai ba pengulih kita ti nampung pengawa nyadi ketuai ngembing menua ke udah bisi diatu,” ku iya.
Program nya mega digulu Rektor UiTM , Prof Dato Dr Jamil Hamali.